شريت السلعة فأيام العطلة ومازال ماسيفطوها شنو المعمول؟

السلام عليكم أخواتي المتسوقات، إخواني المتسوقين
كما لا يخفى عليكم، هاد الأيام عند إخواننا الصينيون هي أيام العطلة د رأس السنة الصينية وبهاد المناسبة تانقولو لهم 新年快乐 تعيدو وتعاودو!

وبهاد المناسبة أيضا جميع مواقع التسوق الصينية تقريبا عندهم أيام العطلة من 10 فبراير إلى 21 منه (من حقهم، الله يكون لهم في العوان العام كامل وهما خدامين).

يعني بصيغة أخرى، أي واحد شرا فهاد المدة ماغاديش تشحن ليه السلعة الا من بعد ما يرجعو هما للخدمة.

هي مانبقاوش نشريو دابا ولا شنو؟

لا ممكن تشري ايلا بغيتي، خصوصا ايلا بانت لك شي همزة، تخفيض ولا كوبون ولا بيع سريع اللي ممكن يتسالا قبل من العطلة، لكن دير فبالك بأن الشحن ماغايكون الا بعد انتهاء العطلة، يعني اللي شرى دابا غير بلا مايجي من دابا يومين أو 3 ايام ويقولينا كاع ماسيفطو السلعة غادي ندير إلغاء الشراء ويردولي فلوسي.

فهاد الحالة غادي نقولك بأنك تقولبتي جوج مرات: 

– المرة الأولى فاش ماعرفتيش بأنها عطلة وأن الشحن ما غايكون تال من بعد مايدخلو للخدمة. 

– والمرة التانية هي فاش لغيتي الشراء! علاش؟ حيث السيد اللي غادي يرد لك فلوسك ما غايدخل تال مور العطلة دونك غاتسنى غاتسنى!! بل الأنكى من ذلك هو أنك غادي تسنى تايرجع من العطلة وتسنى ثاني واحد 10 أو 15 يوم باش عاد يرجعولك فلوسك.

لكن شكون دوزلي الكوموند فاش جيت نشري؟

الشينوا ماشي هما المغاربة، تانشدو العطلة كلشي تايوقف وتانسدو كلشي ونمشيو نتعوطلو، الناس مقادين الموقع باش يخدم ويدوزو فيه لي كوموند بأقل عدد ممكن من البشر، لكن الحاجة اللي تاتحتاج تدخل العنصر البشري، غادي تتسنى تا يدخلو من العطلة.

أنا بعدا عن نفسي، ايلا بانتلي شي همزة، غادي ندوز الكوموند قبل ما يسالي الكوبون أو البيع السريع وفوقاش ما سيفطوها… اصلا معطلين معطلين والله يجعل البركة فخوتنا اللي تاتوصل عندهم السلعة فأسبوع وتايحلفو عليها تاتجلس تسارى وتاكل وتشرب عندهم فكازا وتخيم كاع تا تدوز شهر فخاطرها … رخاها مولانا!

 

إيلا كانت عندكم شي أسئلة أو بغيتو شي كوبون، يمكن لكم تلتحقو بنا في مجموعتنا على الفيسبوك:

www.facebook.com/groups/AliExpressPourMarocains

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست خواتاتي ، خوتي… ها واحد السلام عليكم. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.