طرق الشحن في المواقع الصينية

إخواني المتسوقين أخواتي المتسوقات السلام عليكم

غادي نتكلم لكم اليوم على طرق الشحن في المواقع الصينية. كل موقع تايتعامل مع شركات معينة لكن المبدأ واحد.

طرق الأداء والشحن في موقع جيربيست Gearbest 03

كاين أربعة طرق شحن في المواقع الصينية وهي:

البريد غير المسجل Unregistred shipping:

هو أرخص بريد ويقدر يكون مجاني في بعض المواقع تايدوم بين 15 و 30 يوم (ايلا كان عندك الزهر)، تايتستعمل فيه البريد الوطني للدولة غالبا بحال تشاينا بوسط (وما أدراك ما تشاينا بوسط) أو بريد سنغافورة أو البريد الهولندي (هاد الجوج من أفضل البريد اللي كاين وعن تجربة). فاش تاتشري السلعة تايكون عندك كود د التتبع في الخارج فقط، يعني تاتبقى تشوف سلعتك فين غاديا لكن للأسف غير تاتدخل للبلاد ديالنا بحال ايلا دخلات لمثلث برمودا ما تاتبقى عارفها فين مشات و كاينة إمكانية أنها تضيع في الطريق وعمرها توصلك.

البريد المسجل Registred shipping:

البريد المسجل هو الريكوموندي ديالنا، تايكون زايد شوية د الفلوس (دولار تال 3 دولارات ولا أكثر على حساب السلعة اللي شريتي) تايعطيوك كود للتتبع تاتبع سلعتك فين ما مشات ولو في المغرب و غالبا تاتوصلك السلعة قبل البريد غير المسجل لأن الناس اللي تايخدمو في البريد ما تايطلق واحد منهم السلعة للاخر حتى تايسنيلو عليها و أنت كذلك فاش تاتوصل بها ضروري تاتسني بأنك توصلتي بها. تا هو تايدوم بين 15 و 30 يوم (أنا وصلاتني تيفي بوكس تقريبا في 20 يوم، سبقات شي سلعات شريتهم قبل منها و صيفتهم بالبريد العادي) لكن مؤخرا ولا تايتعطل تا هو بحال البريد غير المسجل.

خط الأولوية Priority Line:

خط الأولوية أسرع شوية من طرق الشحن اللي سبق لي تكلمت عليهم (من 7 تال 15 يوم) وبما أنه سريع فتاتيضربولك البيكورا فيه (مازال جايا البيكورا الكبيرة في الشحن الجاي) بالطبع تايعطيولك كود للتتبع باش تعرف سلعتك فين وصلات. الناس اللي مزروبة شوية على السلعة ممكن تستعمله تانلقاو قيه شركات مثل أرامكس و DHL. اللي شاري شي تلفون غير يعطيهم التيساع حيث إيلا شداتو الديوانة غاتخلص الديوانة والشركة د الشحن.

الشحن المستعجل Expedited Shipping:

هاد الشحن خلاص تايسيفطولك فيه السلعة مع حميدة الرابيد، تاتوصلك السلعة ما بين 3 و 7 أيام مع شركات معروفة مثل DHL و EMS ولكن تايشحطوك مزيان بالثمن!!

هاد الفيديو فيه أنواع الشحن في موقع جيربيست

خلاصـــة عامــــــة:

– اللي خايف على سلعتو تضيع يدير registred mail حيث ريكوموندي واخا تعطل ماشي مشكل

– اللي مزروب على سلعتو يدير priority line ولا Expedited shipping ولكن الثمن غالي (الثمن على حسب السلعة ماكاينش شي طريفة محددة) وكاينة إمكانية يتشد فالديوانة خصوصا ايلا كان بورطابل.

– اللي حاس براسو صحيح وبغا يمرض بالسكر يسيفط السلعة ديالو مع شاينا بوسط

بس: اعتمدت في هاد الاسماء على التسميات اللي موجودة في Gearbest لكن ما كاينش فرق بينو وبين باقي المواقع تقريبا!!

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست خواتاتي ، خوتي… ها واحد السلام عليكم. …

2 تعليقان

  1. السلام عليكم.
    اريد ان اتوصل بسلعتي دون التكلف بإجراءات الجمركة وما الى ذلك من اجراءات اخرى
    هل هناك امكانية
    هل تستطيع شركة الشحن مثلا التكلف بهذا الأمر
    وشكرا جزيلا

    • وعليكم السلام ورحمة الله تعالى وبركاته،
      إذا كنت تنوي استعمال خدمة شحن سريع من شركة خاصة مثل أرامكس أو دي إيتش إيل، فهي التي ستتكفل بعملية جمركة سلعتك، مقابل مبلغ معين (٧٥٠ درهم) كخدمة، بالإضافة إلى مبلغ الجمارك (نسبة من ثمن المنتوج).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.