الرئيسية / مقالات بالدارجة المغربية / شنو هو بيبال Paypal ولاش تايصلاح

شنو هو بيبال Paypal ولاش تايصلاح

اليوم غادي نتكلم لكم إن شاء الله على موضوع بيبال Paypal اللي دوخ عباد الله و ماعرفوه واش كارطة ولا بانكة ولا طرف د الحرشة …

شنو هو بيبال Paypal ؟

بيبال هو موقع تايقدملك خدمات مالية بحال الأبناك العادية اللي تانعرفو (هو ماشي بنك). تقدر تستقبل فيه الفليسات ولا تسيفطهم ولا تشري بيه ولا تدور معايا ايلا بغيتي … هانية والله تا نقبلهم!!

لاش تايصلاح هاد بيبال Paypal؟ وواش هو آمن؟

أول حاجة خاصك تعرفها هي أنه ايلا ما كانش بيبال paypal آمن، الخليفة ع الله، مابقات تقة فهاد الدنيا … يكفي أنك تعرف أنه اليوم جيت ندخل للكونط ديالي في البيبال من التلفون ديالي وهو يديطيكطي بأن التلفون فيه البصمة وقالي واش تبغي تربط فتح الحساب ديالك بالبصمة؟ (بغيت ندير لكم كابتير للشاشة باش تشوفو بعينيكم وهو يقولي التلفون راه هاد الموقع ما تايسمحش تدير هاد البسالات هادي) ويكفي أيضا أنكم تعرفو بأن الموقع فيه أكثر من 200 مليون حساب يعني فوق ثقة لهيه!!

بيبال paypal تايمكنك أنك تشري بيه اللي بغيتي في عدة مواقع مثل Gearbest و Banggood …وكاين مواقع اللي ماتاتقبل غير بيبال بحال Gearbest

الحاج على أوهو! ماتايقبلش بيبال حيث كان عندو موقع تاهو بحال بيبال سميتو Alipay لكن منين دخل هاد العام حبسو الخلاص بيه، ربما تاهما يبقاو يتعاملو ببيبال مستقبلا.

بيبال Paypal تايمكنك أنك ترسل الفلوس لأصدقاءك و عائلتك وليا تا أنا !! ويلا عمات لشي موقع سيفطلك شي سلعة و ماوصلاتش ولا وصلات مهرسة ولا ماشي بالمواصفات اللي عالنين عليها وما بغاش يتفاهم معاك … تايحيدليه بيبال Paypal الحلاقم!!

واش كاين شي اقتطاعات فهاد بيبال Paypal ؟؟

بيبال Paypal تايقدم خدمة مجانية للمشتري وهنا تانقول المشتري فقط ماشي البائع (طبعا مايمكنش سيط قد السخط يخدم هاكاك غير في سبيل الله) … ايلا درتي حساب فبيبال ما تاتخلص والو، ايلا شريتي بيه من شي موقع ما تاتخلص والو، ايلا دور معاك شي واحد فيه هنا تاتحصل: ايلا سيفطلك شي حد الفلوس فيه تايقتاطعولك شي بركة (أنا سيفطلي واحد صاحبي 120$ الله يخلف على بولحية!!، وصلاتني 114.42$) داكشي علاش ربما البياعة فالحاج علي ما بغاوش يتعاملو بيه.

واش ممكن نشري الصولد في بيبال Paypal يسفطولي شي واحد ونخلصو بالدرهم؟ وعلاش أصلا نشري هاد الصولد؟

غير تانتبلاو بالشرا من الحاج علي و شركاؤه تانبقاو هادي زوينة للوجه … نشريها، هادي سبرديلة نايضة … اشريها، هذا بورطابل، هادي مكانة … تا تانصدقو فايتين ديك 10000 درهم اللي محددينها الأبناك للشراء من الخارج. ومع البلية صعيبة، تانوليو نقلبو على الصولد باش ماكان (أنا العام اللي فات ساليت ديك الكيلو د البنكة فشهر 8 بقيت 4 شهور تانشري غير الضيطاي فبيبال).

 

آجي، واش فخبارك باللي تقدر تربح فليسات إيلا خليتي البنكة ديالك هي اللي تصرف العملة، ماشي بايبال؟؟؟

إيلا بغيتي تعرف كيفاش تدير ليها، دخل قرا هاد الموضوع دابا : شنو اللي نختار لصرف العملة بيبال أم البنك؟

 

شراء الصولد في بيبال Paypal :

مع تبارك الله المغاربة ثقة، تشري من بنادم الصولد، يسيفطولك، تخلصو و يدير شكاية عند بيبال بأن السلعة اللي شرا منك فاسدة (ماكاينش شي حاجة سميتها واحد يسيفط الفلوس لواحد فبيبال عندنا في المغرب، الموقع تايعتبر أن داك السيد شرا منك سلعة أو سيرفيس و خلصك و من بعد اكتشف أن سلعتك فاسدة يعني ديما هو الرابح) و شحال من واحد تقولب، ألووغ ايلا ما كانش بنادم فعلا ثقة غير نساو شي حاجة سميتها نشري الصولد.

كيفاش ندير كونط في بيبال Paypal؟

تاتدخل للموقع www.paypal.com

تاتسجل عادي بالمعطيات الشخصية الحقيقية ديالك (سيري تاني ديري ليه فالاسم Fati Fleur ولا تدير انت ثاني : أمير حبيبتي) تاتدير العنوان الشخصي و تدير email اللي عارف ليها الباس و اللي هي غادي تكون اليوزر ديال الدخول للموقع لاحقا (ديرليه تاني ايمايل ما عارفش ليها الباس وجلس تحماق معاه) من بعد غادي يكون مطلوب منك أنت جوج ديال الأمور:

  1. خاصك فاش يسيفط ليك بيبال رابط في الايمايل ديالك باش يتأكد بأن الايمايل صحيح و هو ديالك. خاصك تكليكي على الرابط باش تفاليدي الايمايل (هاد العملية ماعقلتش عليها بزاف حيث عندي كونط من 2007)
  2. غادي يطلب لك بطاقة بنكية باش ت Verifie الكونط. داك الساعة دخل معلومات البطاقة اللي درتي في البنك أو بطاقة لبنك الكتروني (Payoneer أو بنك اخر مثلا). شنو غايدير بيبال بلاكارط ديالي؟ غادي أسيدي يتيري منها 2$ تقريبا. ماشي غادي ياخدها، غادي يشدها و يحطهالك في الحساب ديالك في بيبال. ولاش هاد صداع الراس؟ باش يتأكد بأن البطاقة خدامة بصاح وفيها الفلوس.

وديك 2$ نضيع فيها؟

لا، أول شراء غادي تديرو ببيبال غادي تشري بديك جوج فرنك ويكمل الماكلة من لاكارط ديالك.

بس: قالولي بعض الإخوان أن ديك 2$ تايرجعوهالك فالكونط بونكير (أنا بعدا ما سخناتش بلاصتها .. شريت بها)

إذا فاش تبغي تدير العملية ديال Verification ديال لاكارط سير بعدا أكتيفيها من موقع البنك ديالك باش يمكن تستعمل

هانا درت الكونط وتفاليدات البطاقة واش خاصني نعمر Paypal ولا شنو؟

على هو سطل د الحمام غادي تعمرو؟ ماغادي تعمر حساب ما غاتخويه. فاش تاتجي تشري من المواقع اللي تاتعامل بPaypal غادي يدوزك الموقع لصفحة تاتدخل فيها معلومات حساب بيبال ديالك (الإيمايل و الباسوورد) وتاتأكد العملية بالضغط على أوكي. ايوا و شنو تايطرى؟ أنت شريتي سير فحالك و خلي paypal يخلص فبلاصتك!! هو تايشد ثمن الشراء تايجبدو من لاكارط ديالك و يخلص الموقع!

صافي هادشي اللي كان خالعنا؟ إييه غير هادشي …

يبقى شي واحد يقولي ماتانشريش من جيربيست حيث ماعنديش بيبال و لا ماعرفتش نديرو ولا خفت ندير كونط فيه ويسرقولي المعلومات البنكية .. نبلوكيه على طول!!

هاد الفيديو تايشرح لكم كيفاش تديرو كونط بيبال و كيفاش تفيريفيوه بلا كارط ديالكم:



رابط المقالة الأصلي على مجموعتنا على الفايسبوك:

https://www.facebook.com/groups/AliExpressPourMarocains/permalink/1947956505468705

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست خواتاتي ، خوتي… ها واحد السلام عليكم. …

2 تعليقان

  1. السلام عليكم ..جزاكم الله خيرا على هاد المعلومات.. بغيت نسول كيفاش نقدر نستقبل اموال من البيبال قالو بان خاص تكون عندي بطاقة ائتمانية فيها شعار الفيزا .. ممكن تشرحو ليا كيفاش و اينا بنك اللي ممكن نفتح فيها لحساب ديالي وواش ضروري تكون بنك او ممكن نفتح كونط في البوصطة .. شكرا لكم بزاااااااف

    • و عليكم السلام ورحمة الله وبركاته،
      مرحبا بك. خاص البايبال يكون كايقبل البطاقة الدولية اللي عندك.
      أنا شخصيا كانستعمل بطاقة e-Pay ديال BMCE، طلبتها من الوكالة ديالتي و ربطتها بالبايبال و نقدر نرسل ليها الفلوس من بايبال. كاين أبناك أخرى ممكن تربطي البطاقة ديالها مع البايبال، ولكن ما عارفهمش الصراحة. ممكن تنضمي للمجموعة ديالتنا على الفايسبوك و تطرحي هاد السؤال تماك: ضروري غاديين يجاوبوك الأخوات والإخوان على حسب الحالة ديالتهم.
      والله أعلم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.