الرئيسية / المدونة / أنا، أرامكس، الديوانة … وجيربيست تا هو

أنا، أرامكس، الديوانة … وجيربيست تا هو

أنا، أرامكس، الديوانة … وجيربيست تا هو

أنا، أرامكس، الديوانة … وجيربيست تا هو

aramex

غادي نعاود لكم على قصتي مع أرامكس وجيربيست

هادي تقريبا شي عامين باش بديت الشراء من المواقع الصينية ، لكن في معظم الوقت كنت تانشري غير التويشيات الإلكترونية الرخيصة ودائما تانسيفطها فالبريد المسجل أو البريد ديال فابور اللي ما تاتوصلك فيه السلعة تا تاتنسى واش شريتيها ..

واحد النهار زعمت وتوكلت على الله باش ناخذ تلفون بعدما شفت وقريت أن العديد من الأعضاء وصلوهم التلفونات في أرامكس بلا مايعطيو لا ريال لا جوج للديوانة ..

المهم دخلت لجيربيست واختاريت واحد Oukitel U13 اللي بانلي صاروخ بثمن رخيص .. دوزت لاكوموند واستعملت كوبون اللي خلا لي ثمن التلفون غير ب 119 دولار وطلبت من جيربيست أنهم يديرو نفس الثمن باش شريت، قلت ايلا داز مزيان مادازش نخلص عليه الديوانة ماشي مشكل، وبقيت نتسنى …

واحد النهار وهما يتاصلو بيا من أرامكس .. حقا راه التلفون ديالك شداتو الديوانة وخاصك تدير الإجراءات باش تطلقو (أنا خلاص كنت عارف أنها شداتو غير من التراكين ديالو في موقع أرامكس) المهم سولت ديك السيدة شنو خاصني ندير باش نعتق رقبة التلفون ..

وهنا كانت الصدمة: باش أرامكس تقوم بعملية إطلاق صراح الهاتف خاصني نخلص لهم 550 درهم ديال هاد السيرفيس وعاد شوف شحال تجي في الديوانة، ويلا بغيت نقوم أنا بالعملية خاصني نخلص 150 درهم لأرامكس باش يعطيوني وريقة نديها للديوانة باش نعتق التلفون و نخلص 100 درهم ديال السطوكاج د التلفون عند الديوانة (مخلي عندهم سطل ديال الزميتة مثلا) وعاد الديوانة و ثمن التنقل تال كازا … المهم فلم هندي!

طبعا بديت نكعرر.. بزاف 550 درهم و زيدها عاد الديوانة وانا شاريه غير ب 119 دولار غايولي الثمن مضوبل ..
سالينا المكالمة وبديت ندورها فراسي .. واش نسمح لهم فيه ونقول لجيربيست يردولي فلوسي ولا نخلص هادشي كامل وعاد نطالب جيربيست يعوضوني على هاد الزيادة …
راسلت جيربيست .. قالولي راه التلفون ايلا رجع غادي نديروليه الإتلاف (غادي يرميوه قالك) … بداو المفاوضات…
اتصلت بأرامكس مرة أخرى باش يمشيو يديرو الإجراءات (وبلا مانقولكم طريقة الكلام فالتلفون عند بعض المستخدمين في هذه الشركة، تبارك الله المغاربة فين ما خدمو تايزينو بلاصتهم) قالت لي السيدة المكلفة خاصها تسيفطلي واحد التصريح بالشرف باش نوقعو و نليكاليزيه ونعاود نسيفطولها (بقاليها غير تطلب لي شهادة العمل والعزوبية ..) سيفطاتو قاديت فيه المعلومات و خليتو تانمشي نليكاليزيه (راه مازال تايسمعكم لدابا)

بدا تايجيني لعكز … وانا مالي أخويا على هاد الليكاليزاسيون؟ غادي ناخذ gريمة؟؟
وفي نفس الوقت وصلاتني رسالة من جيربيست تايقولولي راه راسلاتنا الشركة ديال الشحن وتايقولو بأن التلفون محجوز وغادي يضيع ايلا ماجيتيش تاخدو .. وانا ندورها فراسي: هادو اللي مسيفطين ليا هاد الرسالة، إذا ماعندهمش الخبار بالمفاوضات الأولى اللي درنا، أجي نفتح مفاوضات جديدة هههههه

بديت نبكي ونشكي وجبت لهم شهادة الضعف والاحتياج تا وصلتها معهم ل 100 دولار .. وهما يقولولي صافي يا المصيبة قطعتي لينا القلب هاك 100$ فالواليط ديالك (الواليط ماشي الطواليط قراوها مزيان و تبتو معانا) الصراحة جيربيست واليط أنا اللي بروبوزيتها كوم كوا راني غادي نعاود نشري منكم وفلوسكم مايديها غيركم.

الخلاصات:

1. السلعة اللي تقدر تشدها الديوانة واياكم تسيفطوها مع أرامكس ولا DHL راهم يضربو لكم البيكورا ديال الحمار حاشاكم؛

2. جيربيست يقبل المفاوضات وممكن تسترجعو فلوسكم ايلا تكلمتو بلباقة و عرفتو تحاورو معهم و خصوصا إيلا خلصتو التأمين على الشحن؛

3. الديوانة غا انت وزهرك، تقدر تشدلك التلفون و يقدر يدوز عادي.

 

اللي بغا يطالع على الموضوع الأصلي أو عندو شي أسئلة ماعليه غير يزورنا في مجموعتنا على الفيسبوك:

https://www.facebook.com/groups/AliExpressPourMarocains/permalink/1953742824890073

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.