الرئيسية / مقالات بالدارجة المغربية / بطاقة بنك BMCE للشراء من الأنترنت

بطاقة بنك BMCE للشراء من الأنترنت

بطاقة بنك BMCE للشراء من الأنترنت

BMCE

السلام عليكم
باش نجيبو المعلومة الصحيحة ضروري نمشيو ناخدوها من مصدر موثوق ومن المصدر الأصلي داكشي علاش هاد الأيام كنت غادي نفيرسي شي فليسات ف BMCE BANK قلت مع راسي جيت جيت نسول واخا ماعندي ماندير بهم لاني من منخرطي البنك مول العود.

المهم من بعد ماساليت العملية اللي غادي من أجلها قلت لداك الشاب اللي خدام تماك:
– اسمح لي الله يجازيك بخير بغيت نسولك
– مرحبا أسيدي
– عافاك شنو هي البطاقة اللي عندكم ممكن في بنك BMCE نقدر نشري بها من الانترنت في الخارج؟
– مرحبا: بنك BMCE اسيدي داير بطاقة epay اللي ممكن تشري بها من أي موقع من مواقع التسوق الأجنبية
– شحال غادي نخلص عليها في العام؟ (وهي راه هي اللي غاتخلص عليا بالمصرية)
– تاتخلص عليها 110 دراهم في العام
– وشحال نخلص على كل عملية؟
– كل عملية شراء تاتخلص عليها 11 درهم
– 11 درهم شحال ما كان ثمن السلعة اللي خديت؟
– نعم سيدي
– وكيفاش غاندير باش نبدا نشارجيها ايلا بغيت؟
– نورمالمون خاص يكون عندك كونط عندنا في البنك و منو غادي تبقى البطاقة تسحب الفلوس
– هي ضروري يكون عندي كونط في BMCE؟
– وي ضروري أسيدي
– شحال د الوقت خاصني نتسنى ايلا بغيت نديرها؟
– 4 ايام تقريبا.. وهو يزيد يكمل.. كاينة عندنا تا كارط Gold…
– وانا نزرب عليه في الهدرة… لا لا شكرا هاديك عرفتها (اشمن Gold اللي غادي نخلص عليها 390 درهم في العام الله يهديك)
المهم خرجت وانا تانقول الحمد لله على البنك الشعبي تا ياخد 2,2% من ثمن السلعة ماتاتبانش ايلا كنتي شاري سليعة خفيفة.

دابا بالله عليكم، نتسابق مع الناس فلي الصولد ديال الحاج علي وعمي جيربيست ونخدم الكوبونات باش ننقص الثمن ونشري السلعة ب 0.11$ ويجي البنك يدي 11 درهم ظلما وعدوانا ماشي المنكر هذا؟؟

 

هادي هي المعلومات اللي كاينة على بطاقة Epay ديال بنك BMCE. ايلا كان عندكم شي تساؤل أو بغيتو تطالعو على الموضوع الأصلي في مجموعتنا على الفيسبوك:

www.facebook.com/groups/AliExpressPourMarocains/permalink/1956321954632160

 

ايلا كنتو باغيين تطالعو على معلومات حول بطاقة البنك الشعبي icard للتسوق من الخارج فيمكن لكم تزورو هاد الموضوع:
بطاقة البنك الشعبي icard للشراء من الأنترنت

 

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست خواتاتي ، خوتي… ها واحد السلام عليكم. …

تعليق واحد

  1. سلام عليكم خويا بغيت نعرف ثمن ديال الهاتف لممكن نشريه بلا منخلص ديوانة مع كنشوف تلفونات ب 800 و 900 درهم معرفت واش نزعم نشريهم ولا غيتقام عليا بضوبل المهم الى كانت شي طريقة باش نعرف مصاريف الديوانة وشكرا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.