الرئيسية / المدونة / أفضل 3 مواقع صينية للتسوق

أفضل 3 مواقع صينية للتسوق

أفضل 3 مواقع صينية للتسوق

أفضل 3 مواقع صينية للتسوق

 

إخواني المتسوقين أخواتي المتسوقات واحد السلام عليكم (يوميات الفلاح غاتبدا)

غادي نتكلم لكم اليوم على أفضل 3 مواقع صينية للتسوق

بس: الترتيب اللي غادي ندير هو ترتيب شخصي ماشي أليكسا اللي دايراه ولا جوجل ولا شي موقع آخر. اعتمدت فهاد الترتيب على تجربتي الشخصية في الشراء …

بعد هذه المقدمة اللي حطينا فيها الحروف تحت النقط نبداو الترتيب ديالنا:

1. موقع Gearbest.com

التسجيل في موقع Gearbest 01

بعد تقريبا 15 سنة ديال التسوق من المواقع الصينية .. زدت فيه؟

بعد ما يفوق السنة من التسوق من المواقع الصينية، تانعتبر هاد الموقع أفضل المواقع الصينية لتسوق الالكترونيات.
علاش؟؟

– عندو الالكترونيات (الهواتف، الطابليط، clefs usb، الكابلات، ..) بحال ايلا راك داخل لدرب غلف. الغرااق ديال السلعة و بأثمنة مناسبة.

– ديما دايرين الصولد سواء اليومي أو بالمناسبات .. وديما دايرين كوبونات لتخفيض أثمنة السلع.

– تاتدير الكوموند اليوم في الصباح تايسيفطولك السلعة الليلة ديالها ولا لاغدليه، أصلا فاش تاتجي تشري السلعة تايكونو كاتبين فوقاش يسيفطوها.

– السلعة ماتاتعطلش في البريد العادي ويلا تعطلات عرف الديفو من عند بوزبال ديالنا (السلعة هادي شهر باش وصلات للمغرب ومازال خوكم تايتسنى الهلال)

– السيبور تكنيك عندهم نشيط تاتدير شكاية تايجاوبوك فأقل من 24 ساعة وتايقلبو غير باش يرضيوك.

– متواجدين في مواقع التواصل عندهم جروبات بجميع اللغات التي نفهم (في هاد المجموعات تايديرو مسابقات باش تربح بياسات و ممكن أيضا تطلب كوبونات للتخفيض)

– إمكانية الحصول على نقط و كوبونات (الكوبون هو كود تاتنقص به ثمن السلعة) تاتنقص بها الثمن (50 نقطة = 1$)

– وصلاتك السلعة داكشي اللي بغينا ماوصلاتكش تايتفاهمو معاك فيها: إما يعاودو يسيفطوها وإما يردولك فلوسك وبلا تجرجير وتايردولك فلوسك و تايقولك هاك هاد النقط واسمح لنا

عيوب الموقع:

– الأداء فقط ببيبال Paypal واخا تشوفهم كاتبين ماستر كارد راه تاتكليكي عليها و يدوزوك تخلص ببيبال (من مدة طويلة حيدو الشرا بلاكارط ديركت) يعني اللي عندو كارط مامقبولاش باش ت Verifie بها بيبال مايقدش يشري منو.
– مافيهش الحوايج د اللباس بزاف (بداو تايديرو الملابس النسائية والرجالية لكن ماشي بحال با علي)

2. موقع AliExpress.com

aliexpress

 

با علي بحال شي سويقة كبيرة فيها بزاف اللي تايبيعو مطيشة و بزاف اللي تايبيعو البصلة … وانت خاصك تقلب على الرخيص ولوريجينال. موقع ما نحتاجش نتكلم لكم عليه. يكفي أني نقولكم أن الطاجين المغربي تايبيعوه فيه!! (بالطبع ايلا عماتلك سير شريه منهم). الصراحة ما تانرتاحش نشري منو. مولف نتقدى من عند مول الحانوت اللي حدانا (gearbest) فاش تاندخل للسيبير مارشي (aliexpress) تاندووخ.

الموقع به العديد من السلع من جميع الأصناف والأنواع (السبابط، اللباس، الالكترونيك، التعارج .. عاوتاني زدت فيه) وعدة طرق للشحن مما تايجعل المتسوق الجديد تايدوخ. الثمن فيه تايكون في بعض الأحيان (ماشي ديما) أحسن من Gearbest

عيوب الموقع:

– العيب الأول خاصو يجي يتكلم لكم عليه شي واحد شرا في 11.11 هههه (الله يصبرهم و صافي): أكبر مشكل هو تأخر السلعة، فاش توصل السلعة 50 تال 60 يوم باش توصل ماتايبقى لها مذاق! العذاب النفسي ديال الانتظار أقبح من أنه ينصب عليك شي واحد ففلوسك!

– لا يتعامل الموقع بـبيبال Paypal . غادي تقولي وشنو غانديرو بهاد بيبال كاع؟ غادي نقولك بيبال هو اللي تايشد المواقع من حلاقمهم. اللي سيفطلك سلعة و ماوصلاتكش ولا وصلاتك مهرسة ومابغاش يتفاهم معاك تايخرجولو الفلوس من عينيه.

3. موقع Banggood.com

banggood

موقع تايشبه لـ Gearbest تاهو فيه السلعة بحالو غير هو زايد فيخرات فالثمن تاتلقاه ديما زايد الثمن إلا في بعض الحالات النادرة. أيام الصولد تاتلقى فيه هميزات بثمن ماتاتنتظروش غير هو بحال الهميزات ديال Jumia تاتكليكي تاتلقى التران داز وانت مازال تاتسول شحال فالساعة. الموقع موثوق وزايد على Gearbest بدوك التويشيات ديال الماكياج وداكشي ..

اللي زوين فيه هو أنك ممكن تشري بلاكارط ولا ب Paypal ماعندهمش مشكل.

حاجة أخرى الثمن تاينقص ايلا شريتي عدد كبير

عيوب الموقع:

– الثمن طالع شوية

– في بعض الاحيان تاتشري شي همزة و تايقولك تسالات لينا و يردولك فلوسك (أيوا من الاول قولو تسالات!!)

بالطبع هناك مواقع أخري موثوقة مثل:

– موقع Tinydeal.com (التويشيات الصغار) شريت منو ووصلاتني السلعة عادي

– موقع Dealextreme.com ماشريتش منو … عاودولي عليه … إيهاااااب

نصـــــائـــــح عامـــــــــة:

قبل ما تشري:

1. قلب على السلعة في المواقع الثلاثة وشوف شكون اللي فيه أحسن ثمن.

2. سول بعدا على ثمن السلعة في المغرب لتمشي تزرف بحالي: شاري سوفلور ب 30 درهم ومسنيه شهر باش يوصل و واحد النهار خارج من الجامع لقيتو ب 20 درهم.

3. قرا آراء الناس اللي شروها قبل منك.

4. قرا المعلومات اللي دايرين على السلعة

 

اللي بغى يطالع على الموضوع الأصلي أو عندو شي أسئلة، يلتحق بنا في مجموعتنا على الفيسبوك:

https://www.facebook.com/groups/AliExpressPourMarocains/permalink/1810562052541485

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.