الرئيسية / المدونة / كيفاش وعلاش الدرون Drone ممنوع في المغرب؟

كيفاش وعلاش الدرون Drone ممنوع في المغرب؟

كيفاش وعلاش الدرون Drone ممنوع في المغرب؟

خواتاتي و خوتي…

موضوع اليوم هام جدا… فكرنا نقادوه ونشاركوه معاكوم لتعم الفائدة، وأيضا باش نوضعو حد لواحد العدد كبير ديال التساؤلات اللي كايطرحوها بزاف ديال الأعضاء في العديد من المجموعات بحال المجموعة المباركة ديالنا!

قبل مانبداو، نتفاهمو على شي حويجات :

بلا منة عليكم، وبلا جميل، هاد الموضوع خدا وقيت باش تقاد، للفائدة. المرجو من أي شخص بغا يپارطاجيه فشي گروپ آخر أو فالصفحة الشخصية ديالو، يذكر الإسم ديال المجموعة، وماذا بيه يكتب العنوان ديالها، إحقاقاً للحق، لاغير… وشي دعوات للوالدين بطول العمر والصحة والرحمة هنا ولهيه…

غريندااااايزر … إنطلق!

هذا ماشي درون ههه، هذا غرندايزر

موضوع اليوم :

كيفاش وعلاش الدرون Drone ممنوع في المغرب؟

بزاف ديال الناس كايسولو واش يقدرو يكومونضيو درونات من شينوا، و واش غادي تشدهوم الديوانة، و و و … وبزاف ديال الأجوبة كاينة، ولكن ماكاينش شي جواب شافي…

اليوم غادي نحاولو ما أمكن نقتربو من الإجابات النهائية من خلال الرجوع لمصادر على شبكة الأنترنت في انتظار نربطو الاتصال بشي مسؤول بطريقة مباشرة يأكد لينا و لا ينفي فيه هادشي اللي غادي نگولو هنا.

المعلومات اللي غادي نتداولوها هنا المصادر ديالها :

  • موقع الجمعية المغربية للدرون Association Drone Maroc . العنوان ديالها : http://dronemaroc.ma
  • بعض المواقع الصحفية الموثوقة المغربية منها والفرنسية أيضا
Drone militaire
درون عسكري

قبل ما نطيرو بعيد بالدرون، نحاولو نعرفوه…

الطائرات بدون طيار أو الدرون Drones هو واحد النوع من المركبة الطائرة، بدون طيار، يتم التحكم فيها عن بعد من خلال تيليكوموند خاصة، وهي كانت ظهرات لأول مرة خاصة بالاستعمال العسكري (بحال أي تكنولوجيا فالحقيقة!!!). المهام ديال هاد الدرونات هي الاستطلاع وذلك من خلال التقاط صور و فيديوهات جوية لمنشآت ومناطق حساسة …وكملو من راسكوم.

من بعد بان مايسمى بالدرون “المدني” Drone civil اللي تقدرو تستنتجو بسهولة أن الاستعمال ديالو ماشي عسكري، ولكن لممارسة هواية الملاحة الجوية (زوينة هاد الملاحة ههه) وكذلك التقاط صور وڤيديوهات… وهنا منين بدا المشكل!!!

ملحوظة واحد : الدرون فيه زوج أنواع : مول الفرفارات multi-rotors. (هاداك هو اللي كانعرفوه بزاف وكلشي باغي يشريه ماعرفناش علاش ههه) ومول الأجنحة (هاداك كايحلق على ارتفاع عالي ويقدر يقطع مسافات طويلة).

ملحوظة زوج : بالنسبة للقانون الفرنسي، الدرون إيلا فات 800 غرام، كايخص مولاه يدوز واحد امتحان QCM en ligne وخاص يكون فيه ضواو كايسنيو باش يتشاف. ويلا فات الوزن ديالو 25 كيلو ، كايخصو يتسجل ب immatriculation بحال شي موطور ولا طوموبيل، ويكون مصادق عليه homologué ، ومولاه يكون عندو brevet. فيلم باكستاني هذا!!!

 

واش كاين شي قانون كايحدد وكاينظم استعمال الدرون؟

فالخارج : موجودة ترسانة مظبوطة ديال استعمال الدرون، كاتحدد شروط حيازة هاد اللعيبات، وكاتنظم الاستعمال ديالها، خاصة وأنها كاتولي تبرزط ناس أخرين… نقدرو نرجعو نكتبو عليها من بعد.

فالمغرب : عنداك تگول مع راسك راها سايبة ههه… لا آخالي، كاين قانون وتعلن عليه فالجريدة الرسمية Bulletin Officiel بتاريخ 23 فبراير 2015… باقي أخضر، عرفت ههه!

هاد القانون آسيادنا كايگول باختصار أن الحيازة ديال الدرون خاضها ترخيص Autorisation من عند السلطات المختصة، واللي كاتجي على راسها الداخلية. معلوم، بما أن الاستعمال ديال هاد الطائرات يقدر يتضمن أخطار من قبيل تهديد الأمن العام والترابي. هذا من جهة. ومن جهة أخرى، كايهدد الحرية الشخصية ديال بنادم… بلا ما نهدر على خوتنا فاش كاتطيح فيديهوم شي تكنولوجيا بحال هادي…

أول حاجة كايفكر فيها هي يتفرج فبنت الجيران كاتنشر الحوايج فالسطح، و كمل من راسك…

 

Drone Professionnel
درون مهني إحترافي

شكون يقدر يحصل على رخصة ديال درون؟

خاصك تكون مهني professionnel باش تقدر تخرج رخصة تخدم يداك الدرون في إطار العمل ديالك. كايدخل في هاد الإطار:

  • العاملين في مجال الإعلام : الصحافة، صناعة الأفلام، وكالات التواصل Agences de communication، وما شابه ؛
  • بعض الإدارات اللي كاتحتاج الاستعمال ديال هاد الماتريال…بحال الفلاحة، الصيد البحري، الوقاية المدنية، … هاد الناس يقدرو ايستعملو الدرون فالمراقبة ، في الوقاية، فالتدخل السريع،… موجود مايتدار…

للإشارة، الرخصة كايخصها تتجدد سنويا، ومع ذلك، فوسط العام فوقت ما تبغي تخدم بالدرون المرخص كاتطلب رخصة عاودتاني من عند السلطة المحلية (القيادة).

إيوا ياك أنا سيڤيل، وداك الدرون سميتو “سيڤيل”… إذن نقدر نشريه…

ههه، جرب و شوف!!! راه ماشي غير بغاو يمنعوك وصافي، رأه غير كاين قانون توضع باش يخدم المصلحة العامة بالدرجة الأولي. إيلا كنتي فيك واحد من هاد الشروط اللي ذكرنا ، مرحبا…

 

واخا… ويلا لقاو عندي درون؟

  • إيلا وصلك شي درون من برا، وشداتو الديوانة غادي يعيطو ليك ويسولوك : كاين شي طوريزاسيو؟ إيلا لقاوها هز طيارتك وخرج (ولكن بلاتي، ماتخدمهاش حتى نقوليك فوقاش…صبر هانا راجع!). إيلا مالقاوهاش : السيزي، ويقدرو يضربوك بشي غرامة محترمة (سمعت شي “بركة” أي عشرالاف درهم)، ولا قدر الله، اعتقال ومحكمة…يا لطيف!!!
  • إيلا كان عندك درون قبل مايخرج داك القانون اللي هدرنا عليه الفوق، ضروري من السلطات المحلية حداك تعرفو، ويا تخرج ليك رخصة، يا تحيدو ليك!
  • إيلا شي توريست جاي داخل وجايب معاه درون، مايخليوهش يدخل بيه. يقدرو يجرجروه، ويلا عندو شي زهر وديكلاراه قبل ما يدخل للتراب الوطني، يخليوه عندهوم معزز مكرم ويعطيوه reçu حتى يكون راجع وياخدو في أمان الله.

 

ولكن علاش بنادم شرا درونات صغيورين ودخلهوم…؟

آه، كاتهدر على دوك قشاوش ديال عيشورة؟؟؟ الدرون باش يولي كايشكل خطر كايكون عندو مواصفات معينة، ويقدر يهز كاميرا، وبالخصوص، يكون كايوزن فوق من واحد القدر معين ديال الغرامات… راه هدرنا الفوق على كيلو قل ميتين.

وزيدك، والله و فكرتي تغير المعالم ديال داك اللعبة، وتردها كاتصور وكاتتيري القنبول و و و… والله و حصلتي راك عارف…

Drone Jouet
درون لعبة

واخا، منين ناخد الرخصة باش نشريه؟

راه گلنا ليك خاصك تكون مهني، عاقل؟ ماعليناش… كاتمشي لعند الوزارة المنتدبة المكلفة بالتجارة الخارجية، واللي كاتنسق مع الداخلية، وتقدر تدخل فيها حتى الوكالة الوطنية لتقنين المواصلات ANRT

(هادي تابعانا فالتيليفونات، فالويفي، وحتى فالدرونات…؟؟؟)

لا آمولاي، دايرة خدمتها، من حيث الدرون فيه موجات ديال الإرسال…

 

إيوا دابا أنا ماغاديش نحقق الحلم ديالي نولي طيار بلا ما نطير؟؟؟

هههه، إيلا بقيتي كاتطير غادي تجيبها فعظيماتك!!!

ولكن عقلتي منين قلت ليك جبت هاد المعلومات كاملة؟؟؟

كاينة جمعية ديال الدرونات… والجمعية قانونيا كاتدخل في خانة المؤسسات الرسمية اللي معترفة بها الدولة…يعني تقدر تخرج رخص للأعضاء ديالها باش يستعملو الدرون فشي حاجة ماكاتعارضش القانون!!! مثلا :

  • مسابقات فقيادة الطائرات من نوع الدرون في إطار تعليمي محض، بتنسيق مع السلطات المحلية، بحال الجوندارم ؛
  • تصوير تظاهرات فنية، ثقافية، … بالدرون، في إطار أشغال الجمعية، ماشي لأغراض شخصية…(نسا العرس ديال خوك الكبير ولا بنت خالتك ههه)
  • و قس على ذلك…

يعني تقدر تقرر تنخرط فهاد الجمعية اللي كاينة، ولا تجمع الخواتات والخوت اللي هنا، باغيين يطيرو، وتديرو جمعية ديالكوم، سميوها “جمعية قدماء أصدقاء السي علي الراپيد”😁اللي باغيين يطيرو…ههه

باقي شي سؤال؟

كانظن ضربنا الدورة على السيكتور… ويلا تفكرنا شي حاجة من بعد نزيدوها هنا!!!

 

إيلا بغيتي تجمع مع شي واحد على الدرون و كيفاش تشريه… هاهو الرابط ديال الموضوع الأصلي فالمجموعة ديالنا على موقع الفايسبوك :

https://www.facebook.com/groups/AliExpressPourMarocains/permalink/1993455197585502/

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.