الرئيسية / أشهر مواقع التسوق الصينية / GearBest.com / واش موقع غيربست GearBest موثوق؟

واش موقع غيربست GearBest موثوق؟

واش موقع غيربست GearBest موثوق؟

السلام عليكم… موضوع اليوم موضوع هااااااام جداااااا…

الله يرحم الوالدين، شي أسئلة من قبيل :

  • واش موقع غيربست GearBest موثوق؟
  • واش البائعين فهاد الموقع نصابة؟
  • سافطوليا ميساج كايگولو ليا دير شي حاجة، واش نديرها؟
  • إلى غير ذلك من الأسئلة…

غير ماتبقاوش تطرحوها!!!

Logo Gearbest

⁩موقع غيربيست، أحب من أحب وكره من كره، موقع موثوق تقدر تشري منو بعينيك مغمضين. هاد الموقع ما فيهش البائعين اللي كاتتعامل منك ليهوم، بحال علي إكسپريس. هاد الموقع كاتتعامل معاه بحال إيلا هو بائع وحيد، عندو دوك السلع كاملة مخزنها في مستودعات خاصة ديالو، واللي كايشتاغلو فيها موظفات وموظفين دياولو، هوما اللي كايتوصلوا بالطلبات وكا يعزلوها ويحطوها فالميكات والكراطن وكايسيفطوها.

⁩خدمة قبل و بعد البيع :

من أحسن ما شفت لحد الآن عن تجربة شخصية. وقت ما سولتي على شي حاجة، كا يفتحو ليك Ticket خاص، بمعنى محادثة/مراسلة مع شخص، وما كايتسد التيكي حتى كايتحل المشكل. تقدر تسول على المنتوج قبل ماتشريه، وتراسلهوم إيلا كان شي مشكل بعد الشراء.

في هذا الصدد، عند موقع غيربيست ماكانهدروش على شي حاجة سميتها litige ولا dispute بحال فالمواقع الأخرى : كانهضرو على ticket.

كايحاولو يحلوا معاك المشكل بجميع الطرق المتاحة ليهوم، وبالتجربة أيضا، كايوضعو الرضى ديال الكليان فوق كل اعتبار (بطبيعة الحال راه حنا داويين على كليان د بصاح اللي كايحتارم راسو…ماشي الكليان قليل النية!).

⚠⁩الله يعطيكم الستر، نصيحة هامة :

أي حاجة طلبوها منك فالميساجات ديالهوم راها كاتصب في مصلحتك، غير تبع معاهم وما يكون غير خاطرك! بلا ما تبقى تتنوى…

⁩الخلاص ب PayPal…

سالينا..! هاد الموقع ما صدعش راسو بزاف، اختار أحسن وأأمن طريقة لدفع الأموال، باش يحمي راسو و يحمي المستهلك. يعني يكفي يكون عندك حساب پايپال مفعل ورسمي وهانتا كاتشري بكل سهولة.

الموضوع ديال پايپال راه صايبو الأدمين رشيد مشكورا، قراوه…

⁩نقط الوفاء…

الصراحة، هنا كاينة الاستفادة بالخصوص إذا كنت كاتشري بزاف من عند هاد الموقع. على كل عملية شراء كايعطيوك نقيطات، على كل تقييم/رأي عطيتيه على شي منتوج كايعطيوك نقيطات، على كل ڤيديو صورتيه ديال شي منتوج وصلك من عندهم كايعطيوك نقيطات…

هاد النقيطات كايتحولوا دولارات وكايبقى عندك رصيد مخبي فالبزطام الخاص بيك على الموقع، كايسميوه Wallet. مايمكنش ليك تخرج ديك الفلوس كاش، ولكن يمكن ليك تشري بيها عندهوم.

شخصيا، كاننسى راسي حتى كانلقا تجمعات شي عشرين ولا ثلاثين دولار غير هاكداك، يا كانشري بيها شي حاجة اخرى، أو كانكمل بيها ثمن ديال شي منتوج ساوي ثمن (بحال شي هاتف ذكي!).

إيوا دابا… واش موقع غيربست GearBest موثوق؟

بصفة عامة، غير تعاملو مع هاد الموقع وانتوما مهنيين. كاتبقى القضية ديال الأثمنة، مصاريف الشحن، إلى آخره… مسألة شخصية كاترجع ليك انت… شري فين بغيتي وبالثمن اللي بغيتي…

هاد الموضوع كايعبر على الرأي الشخصي ديالي فهاد الموقع، اللي شاري منو دابا أكثر من خمسين منتوج، بدون مشاكل تذكر، والحمد لله. واخا كانختار بعض الخطرات أثمنة زايدة على مواقع أخرى، كانربح راحتي النفسية.

ملحوظة هامة :

هاد الموضوع ما كايعنيش أن موقع علي إكسپريس أو تايني-ديل او بانگگود مامزيانينش!!! هاد الموضوع قررت نحطو باش مانسمعوش نفس الأسئلة المتكررة على حاجة واضحة، و راها مكتوبة فالصورة المرفقة!!!

و دمتم سالمين.

 

إيلا بغيتو تتلاقاو و تسولو ناس حقيقيين جربو هاد الموقع هو ومواقع أخرى ديال الشرا من الشينوا، آجيو نآجوتيوكوم معانا فابور ههه، في المجموعة ديالنا :

https://www.facebook.com/groups/AliExpressPourMarocains/

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.