الرئيسية / المدونة / نصائح عند التوصل بالسلعة

نصائح عند التوصل بالسلعة

نصائح عند التوصل بالسلعة

إخواني المتسوقين، أخواتي المتسوقات سلام الله عليكم
اليوم بغيت نقولكم شي نصائح لأمور تديروها سواء قبل أو عند التوصل بالسلعة …

البعض منكم يقدرو يكونو أول مرة تايسمعوها والبعض الآخر اللي ولاو محترفين في الشراء من المواقع الصينية غادي يكونو ديجا عارفينها لكن كيما تايقولو … النصيحة ما تاتقتل ما تاتحيي!

فاش تاتدير شي كوموند فموقع علي إكسبريس ويسيفطهالك البائع تايبدا الحساب ديال مدة الشحن. تايبدا واحد العداد تايحسب لك 60 يوم كفترة حماية للمستهلك، بصيغة أخرى هاد المدة ديال 60 يوم هي الفترة اللي تايخص السلعة توصلك فيها واللي تايكون عندك الحق فيها تريكلامي إيلا ماوصلاتكش السلعة لذلك أول حاجة تديرها هي تبقى حاضي داك العداد باش ما تسالاش ديك 60 يوم ديال الحماية و انت فدار غفلون.

فاش تاتبقى واحد 4 أيام على انتهاء الفترة تاتجيك نوتيفيكاسيون من عند علي إكسبريس، داك الساعة سيفط ميساج للبائع باش تطلب منه انه يمدد ليك مدة الحماية. وحاول تصبر عليه ايلا ما جاوبكش حتى مايبقى إلا نهار واحد (الله يكون لهم في العون راهم تايتعاملو مع العالم كامل) فهاد الحالة ممكن تفتح ليتيج عند علي إكسبريس … تاتكون داك الساعة درتي اللي عليك!

بالنسبة لموقع جيربيست الأمر مختلف شوية، ماعندهم لا فترة حماية ولا هم يحزنون، ما يمكن لك تريكلامي بأن السلعة ماوصلاتكش تا تفوت 60 يوم فهاد الحالة خاصك تسيفط رسالة للسيبور وهما تايتفاهمو معاك واش يعاودو يسيفطولك السلعة ولا يردولك فلوسك. خاصك تراسلهم قبل ما تدوز 90 يوم لأنها ايلا فاتت هاد المدة … داز فيك القطار هههه

لنفرض الآن أن الأمور دازت مزيان وجا عمي الفاكتور عطاك السلعة … ماتنوضش انت من كثرة الفرحة تجي وتحل الكولية بالزربة … شكون قالك أنك ماغاديش تحل الكولية وتلقى شي حاجة ناقصة أو مهرسة أو سلعة اخرى ماشي هي اللي شريتي؟؟ 

لهذا قبل ما تحل الكولية جيب بورطابل ديالك وعطيه لخوك ولا اختك الصغيرة يصور بالفيديو عملية الفتح حيث فاش تايوقع المشكل تايولي هاد الفيديو هو الاتباث اللي عندك بأن السلعة ماوصلاتكش كاملة .. أنا واحد المرة وصلاتني ميكا خاوية هههه لكن صورت العملية كاملة بالفيديو ورد ليا جيربيست فلوسي!! 

فمثلا فاش تاتوصل بتلفون ماخدامش أو فيه شي مشكل، خاص تصورو باش مايقولكش أنت اللي خسرتيه، وفاش تراسلهم، تاتسيفط لهم الفيديو لأنه دليل قاطع على صدق ما تقوله. حيث كاين اللي تايتوصل بالسلعة مزيانة مافيها والو وتاينوض يقولهم راها خاسرة باش يردوليه فلوسو، تاهما ولاو يعيقو وولاو يطلبو منك دليل الإثبات.

حتى الصور تعتبر بمثابة إثبات .. راه الشناوا مافيهمش التحراميات اللي فينا ويلا ولات فيهم راه حنا اللي علمناها ليهم .. (فجيربيست جاتني واحد البياسة البريز ديالها مهرس وصورتها وردولي فلوسي)

حاجة أخرى، ايلا وصلاتك السلعة ماتكليكي فعمي علي على البوطونة ديال التوصل بالسلعة تاتقلبها مزيااان اللهم هو يتسناك والا انت تمزرك وتكليكي (صحيح أنهم تايعطيوط واحد 15 يوم اضافية باش تجرب السلعة خصوصا ايلا شريتي شي بورطابل مثلا لكن الاحتياط واجب!!)

ماتمزركش وتفتح ليتيج ايلا لقيتي السلعة اللي توصلتي بها ماشي هي اللي ظنيتي أنك شريتيها (هما دايرين مثلا الغشا ديال الهوفر بورد ب 10 دولار وانت صحابلك الهوفربورد براسو ساوي داك الثمن وقلتي الهمزة جابها الله) أو القياسات اللي فالسلعة اللي توصلتي بها ماشي هي اللي كنتي تاتظن (بانتلك السلعة في التصاور كبيرة وهي في الاصل كاتبين القياسات ديالها وراها صغيرة). ارجع أولا لصفحة السلعة وقرا داكشي اللي مكتوب حيث حنا المغاربة ماتانقراوش، تا تانتقولبو عاد تانبداو نقولو اااه والله ايلا هاهي مكتوبة! فهاد الحالة لا يعذر شخص بعدم قراءته للتعليمات.

بطبيعة الحال فاش توصلك السلعة وتعجبك مافيها باس تضرب تصيورات وتحط تقييم للبائع فعلي إكسبريس ولو أنها ما تاتعطيك لا نقط لا والو لكن غادي تفيد بها ناس اخرين اللي باغيين يشريو نفس السلعة حيث غادي يشوفو السلعة على حقيقتها ماشي من خلال الصور د الموقع اللي دايرين ليهم الماكياج (لولا الصور اللي حطو الناس اللي شراو شحال من مرة كنت غادي نتزرف فشي بياسات).

أما بالنسبة لجيربيست، فمن الأفضل لك أنك تدير التصاور وحتى الفيديو ايلا قديتي تديرو، حيث تاتربح عليهم نقيطات فاش تايفاليديو ليك الريفيو review ديالك.

تانظن هادشي اللي عطى الله … ايلا كانت شي إضافات ممكن تزيدوها في التعاليق أو تقولوها لينا في مجموعتنا على الفيسبوك:

www.facebook.com/groups/AliExpressPourMarocains

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

عرض جديد على موقع جيربيست

حصريا: عرض جديد على موقع جيربيست

العرض الجديد على موقع جيربيست كما لا يخفى عليكم فقد ظهر في الآونة الأخيرة، وعلى …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.