الرئيسية / المدونة / نقطة البداية للشراء من مواقع التسوق الصينية

نقطة البداية للشراء من مواقع التسوق الصينية

نقطة البداية للشراء من مواقع التسوق الصينية

السلام عليكم
هاد الموضوع خاص بالناس اللي عاد غادي يقولو بسم الله ويبداو من نقطة البداية للشراء من مواقع التسوق الصينية، وتا اللي سبق ليه شرا مافيها باس يطل عليه يقدر يلقى شي تويشية اللي تنفعو.

شنو هي أول حاجة نبدا بها؟

أول حاجة باش تبدا تشري من المواقع الأجنبية هي تمشي للبنك تدير بطاقة بنكية دولية: غير تاتمشي للبنك ديالك وتقولها لهم تايعرفو إينا بطاقة غادي يعطيوك. أفضل بطاقة بالنسبة للناس اللي العمر ديالهم أقل من 30 سنة هي Code 30 اللي عند CIH ولو أنه ولات تبان فيها بعض المشاكل في التطبيق ديال البنك عند عملية الشراء لكن تانظن أنهم دابا يلقاو ليها شي حل.

اللي فايت العمر ديالو 30 سنة، إما يدير بطاقة ديال البنك الشعبي اللي تاتبان لي هي الأفضل من حيث الاقتطاعات أو بطاقة ديال البنك اللي هو عندو كونط فيه (الأثمنة تاتختلف وكل بنك وكيف تايدير يعضك).

من بعد ماتدير البطاقة وتتوصل بها ضروري تدير كونط في موقع Paypal باش تقدر تشري من بعض المواقع مثل Gearbest و Banggood

باش تفهم أكثر شنو هو بيبال تانصحك أنك تقرا هاد الموضوع: شنو هو بيبال Paypal ولاش تايصلاح

شنو هي المواقع اللي ممكن نشري منها؟

أهم المواقع الصينية اللي تايشريو منها الناس بكثافة هي: AliExpress و Gearbest و Banggood و Tinydeal و كاين مواقع أخرى شراو منها أعضاء مجموعتنا أنا ماسبقليش شريت منها بحال Wish و Asos. غادي تلقاو فهاد الرابط محاولة متواضعة لتوضيح بعض الفروقات بين المواقع الثلاثة الأكثر شهرة: أفضل 3 مواقع صينية للتسوق 

دخلت لهاد المواقع، شنو خصني ندير؟

أول حاجة تبداو بها هي التسجيل في هذه المواقع ودخلو الاسم و العنوان ديالكم الحقيقيين باش غاتجيكم فيه السلعة. هادي بعض الفيديوهات اللي تاتشرح عملية التسجيل:

التسجيل في موقع علي إكسبريس: 

إدراج العنوان في علي إكسبريس:

التسجيل في موقع جيربيست وإدراج العنوان: 

هانا تسجلت وبغيت نشري شنو خصني ندير؟

– أول حاجة خاصكم تديروها هي تحددو شنو باغيين تشريو، ايلا بقيتو غير تا تاتساراو في المواقع غادي تضيعو وقت كبير وماغاتشريو والو حيث السلع اللي كاينة كثيرة بزااف والمواقع ماتاتحدش. شي مرات قبل النعاس تانقول نطل نشوف شنو السلع اللي كاينة تنصدق ناعس تالربعة د الصباح.

– ثانيا خاصكم تعرفو مثلا اسم السلعة بالانجليزية أو الفرنسية باش ممكن تدير بحث وتلقاها بسرعة.

– ثالثا خاصكم تعرفو بأنكم ممكن تلقاو نفس السلعة بأثمنة مختلفة في نفس الموقع أو في مواقع مختلفة لذلك خاصكم تقلبو مزيان على أفضل ثمن عاد تشريو … لا زربة على صلاح!

بالنسبة لموقع علي إكسبريس فيه بزاف د البياعة، لذلك قبل ماتشري خاصك تشوف داك البائع واش عندو تقييمات مزيانة من عند الناس ولا لا وشحال عدد الكوموندات اللي تدارو عندو. وتشوف التصاور ديال السلعة اللي حاطين الناس باش تاخذ فكرة حقيقية على السلعة اللي غادي تشري و مافيها باس تقرا التعليقات ديال الناس اللي شراو حيث في بعض الاحيان تاتاخد منها معلومات ماكايناش في التعريف اللي داير البائع.

الثمن المزيان هو الثمن اللي ايلا جمعتي ثمن السلعة مع ثمن الشحن يكون هو الأفضل مابين الاثمنة الموجودة!!

لقيت السلعة وبغيت نشري لكن ماعرفتش شنو ندير؟

هادي بعض الفيديوهات اللي تاتشرح عملية الشراء من المواقع الصينية:

الشراء من موقع علي إكسبريس:

الشراء من موقع جيربيست:

الشراء من موقع بانككود:

تانسمع بشي حاجة سميتها الكوبونات، شنو هي؟

الكوبونات هي كودات تايعطيهم لك البائع أو الموقع باش تنقص بهم الثمن د السلعة. تاتلقاهم إما في المجموعة ديالنا على الفيسبوك أو ببحث بسيط في جوجل. بعض المرات تايخصك تكونيكطا من الحاسوب باش يخدم لك الكوبون. ولو أن عملية الشراء من التطبيق غالبا ماتاتكون مفيدة حيث تاتلقى في بعض الأحيان الثمن في التطبيق أرخص من الثمن مباشرة في الموقع.

الناس ضربو الهموز وشراو بالرخا، إمتى تايكون هادشي؟

التخفيضات تاتكون في جميع الأعياد ديال الشناوا: عيد العزاب (11 نونبر) والاعياد الوطنية، عيد المسيرة الخضراء (الله ياودي أشمن مسيرة دارو الشناوا)، هالوين، السنة الصينية الجديدة. المهم الاعياد ديالهم تايخبرو بهم بكري باش الناس تاتوجد الفلوس.

شنو هي طريقة الشحن اللي خاصني نختار؟

طرق الشحن هي طرق الارسال باش غادي يسفطولك السلعة كاين اربعة (ممكن تطالعو على الفرق بيناتهم في هذا الموضوع: طرق الشحن في المواقع الصينية

– ايلا كانت السلعة رخيصة: سيفطها في البريد غير المسجل ودير التأمين أو لاتديروش على حساب واش تستاهل السلعة ولا

– إيلا كانت السلعة غالية شوية دير ليها البريد المسجل (ريكوموندي) ودير التأمين باش تهنى من الصداع.

– ايلا كنتي مزروب بها دير البريد السريع: اراميكس ولا DHL ولكن راه

أقبح بريد هو البريد الصيني حيث ديما سلعتك معطلة وأفضل واحد في البريد المسجل هو البريد الهولندي أو السنغافوري. بداو مؤخرا يستعملو البريد البلجيكي في موقع جيربيست لكن التتبع ديالو تايكون معطل شوية.

واش ممكن نعرف فين وصلات سلعتي وواش قربات توصل ولا وصلات؟

– ايلا درتي البريد غير المسجل ماغاتعرفش فين وصلات تا تجيك (ايلا وصلات)

– ايلا درتي البريد المسجل أو السريع (أراميكس و DHL) تايعطيوك رقم التتبع وممكن تعرف سلعتك فين وصلات عن طريق بعض المواقع أو التطبيقات مثل 17Track

كيفاش غاندير نتوصل بالسلع اللي شريت؟

في غالب الأحيان تاتجيك السلعة تالدار (إيه أسيدي شكون بحالك) ويلا مالقاكش الفاكتور تايخليلك ورقة باش تمشي تجيبها من البوسطة. ويلا كانت السلعة كبيرة تايقولك دوز جيبها من البوسطة راه الموطور ماغايهزهاش. ايلا كنتي داير البريد المسجل تايخصك تقدم لاكارط ديالك وتوقع باش عاد تاخذ السلعة.
اللي ماتايوصلش عندهم الفاكتور من الأفضل يدير Boite postale في البوسطة القريبة ليه باش يتهنى.

ايلا ماوصلاتنيش السلعة أو وصلات مهرسة شنو ندير؟

– في موقعي جيربيست و بانككود: 
فهاد الموقعين عندك الحق أنك تريكلامي ايلا ماوصلاتكش السلعة بعد مرور 60 يوم من التاريخ اللي رسلو ليك فيه السلعة. داك الساعة تاتراسل الموقع وتقوليه راه درت الكوموند فالنهار الفلاني وماوصلاتنيش وداك الساعة تايشوفو معاك شي حل. ايلا كنتي درتي التأمين راه تايعطيوك فلوسك كاملة أو يعاودو يسيفطولك السلعة أما ايلا ما درتيهاش تاتدخل معهم فمفاوضات باش تسترجع قدر من المال.

– في موقع علي إكسبريس:
نهار تايسيفطلك البائع السلعة تايبدا واحد العد التنازلي ديال 60 يوم تاتسمى مدة الحماية. ايلا ماوصلاتكش السلعة وقربات تتسالا هاد المدة تاتراسل البائع باش يزيد يمدد مدة الحماية. ايلا ما جاوبكش أو ماوصلاتكش السلعة ممكن تدير شكاية Litige/Dispute عند علي إكسبريس وهو تايفصل بيناتكم.

بالنسبة للمواقع اللي ذكرت كاملة:
فاش توصلك السلعة دير فيديو أثناء فتح الكولية باش ايلا صدقات السلعة مهرسة ولا ناقص منها شي حاجة تايكون حجة لك على الموقع و تاترسلو لعلي إكسبريس أو لبيبال كحجة أثناء الشكاية ايلا ماتفاهمش معاك البائع/الموقع.

تانظن هادشي اللي عطى الله تحياتي للجميع

إيلا كانت عندكم شي أسئلة ممكن تطرحوها علينا في مجموعتنا على الفيسبوك:

www.facebook.com/groups/AliExpressPourMarocains

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.