الرئيسية / المدونة / نصائح قبل الشراء من مواقع التسوق الصينية

نصائح قبل الشراء من مواقع التسوق الصينية

نصائح قبل الشراء من مواقع التسوق الصينية

سيادنا واحد السلام عليكم
واحد المجموعة منكم عاد بداو الشرا من مواقع التسوق الصينية وكاين خلاص اللي سبقليهم شراو مرارا وتكرارا حتى ولاو عارفين مجموعة من المعلومات على هاد القضية. اليوم غادي نتكلم على واحد المجموعة من العمليات اللي خاصها تولي ريفليكس عندكم قبل الشراء من مواقع التسوق الصينية (البعض غادي تكونو تاتعرفوه بحكم التجربة ديالكم في الشراء من الانترنت)

كاين 13 خطوة خاصكم تديروها قبل ما تكليكيو على البوطونة د الخلاص:

1. أول حاجة عطي التيساع للمواقع اللي ماتاتعرفهاش تقدر تصدق مواقع نصابة وتديلك داك البركة اللي عندك وانت فرحان وتاتسنى وتاتقول ضربت الهمزة … تاتصدق لا فلوس لا سلعة. غادي تقولي باش غادي نعرف هاد المواقع وانا جديد في الميدان. غانقولك سول الناس اللي شراو من قبل، ماشي عيب أنك تسول والمجموعة ديالنا على الفيسبوك دايرينها لهاد الغرض!!

2. التعامل عن طريق بيبال: بيبال ماشي غير طريقة باش تخلص السلعة ديالك، بل أكثر من ذلك راه هو الحكم اللي تقدر ترجع ليه إيلا الموقع ما سيفطلكش السلعة ولا سيفطها خاسرة، والمواقع تايخافو أنك تحتكم ليه، واحد المرة شريت ساعة من جيربيست وداز الخلاص جوج مرات، فاش راسلت الموقع قالولي حنا وصلنا غير خلاص واحد، غير قلتها لعمي بيبال قلت ليه ألشريف راني هدرت معاهم وقالولي ماعندنا والو غير سير شكي … خرج منهم فلوسي بالسيف!!

3. ايلا كنت تاتشري بالبطاقة البنكية خاصك ديما تدير واحد القضية: أكتيفي لاكارط من موقع البنك، شري بيها و عاود ديزاكتيفيها باش تفادى أن شي واحد يسرق لك المعلومات د لاكارط و يشري بها.

4. قبل ما تشري، ديما قارن الثمن في المواقع الثلاثة المشهورة Aliexpress و Gearbest و Banggood هادو اللي تايكونو عندهم أثمنة مزيانة دونك ديما نشوف هنا و هنا باش نلقى أحسن ثمن.

5. رد البال لمواصفات السلعة، غاتشري مثلا شارجور شوف البريز اللي يناسبك بحال عندنا حنا خاصنا ديما نختارو Euro Plug ماشي US Plug ولا UK Plug البريزات مختالفين ويلا ختاريتي شي واحد غالط خاصك أدابطاطور .. غاتشري سروال ولا جاكيطة رد البال للقياسات لاتشري بياسة ليك تصدق من زهر خوك الصغير!!

6. ضروري قبل مانشري نمشي نشوف آراء الناس اللي شراو والصور اللي تايحطو، راه الصور اللي داير الموقع غالبا تايكون داير لهم الماكياج انت خاصك تشوف السلعة بلا ماكياج باش تعرف أش واخد!!

7. ماشي بالضرورة تطيح كي العمى وتبقى غير تاتشري .. كيما تايقولو: شاف الربيع ما شاف الحافة!! عجباتي شي بياسة وبانلي ثمنها غالي نديرها فلاليسط ديال لي فافوري ونصبر شوية راه تايديرو التخفيضات في بعض المناسبات: أنا تاندير البياسات في لائحة الفافوري وتانبقى نطل عليهم مرة مرة، غير تانلقى الثمن طاح تانطيرها.

8. خاصك تعرف بأن غالبية السلع اللي تاتشريها و ترسلها بالطريقة العادية تاتدوز من 20 إلى 60 يوم في العادة، خلاص كاين السلعة اللي تاتدوز اكثر من هادشي خصوصا مع معشوقة الجماهير: البريد الصيني، إذا ايلا جيت نشري خاصني نتفادى أنني نختار تشاينا بوسط في الشحن، ويلا كنتي مزروب خلص شوية ديال الزيادة باش تجيك بطرق أسرع. ومافيها باس نزيد واحد2 تال 4 دولار وتسيفطها في البريد المسجل باش تبقى متبع رزقك تا يوصل لدارك.

9. خاصك تعرف بأن بعض البياسات ضروري تخلص عليهم الديوانة واخا تكون انت شاريها همزة وغير ب 10 دولار التليفونات مثلا أو الطابليطات تاتدير لهم الديوانة التقييم ديالها ماشي بشحال شريتيها انت أو ايلا شريتي كونتيطي كبيرة من شي سلعة ولو تكون رخيصة، صحيح أنه ممكن تتفاهم مع البائع باش يكتبلك ثمن ناقص لكن الاحتياط واجب، زيادة على أنه ماشي بالضرورة نجمع عرام ديال السلعة فباك واحد باش تجيني ضربة واحدة. على العموم الديوانة انت وزهرك تا لخلا دار بوك هههه!!

10. بعض السلع ممنوع أنها تدخل للبلاد مثل الدرون اللي فيه الكاميرا وحتى الباور بانك تاهو ولا ممنوع يتشحن من العديد من المواقع الصينية في اتجاه المغرب … لذلك ماكاين لاش تصدع راسك وتشريها راه ماغاديش تحلم أنك تشدها وحتى كاع ايلا جبتيها بطريقة ملتوية ولقاوها عندك غادي يحيدوهالك (تانهدر على الدرون)

11. موقع علي إكسبريس فيه واحد القضية ما كايناش في باقي المواقع وهي أنه فيه بزاف ديال البياعة لذلك فاش تقلب على واحد السلعة قارن الاثمنة اللي غاتلقى وبالطبع ماتشوفش غير الثمن اللي دايرين للسلعة بل حتى ثمن الارسال راه تاتلقى شي مرات سلعة تاتدير 30 دولار و هو داير ليها 17 دولار ولكن الشيبين دايرليه 25 دولار، شنو ربحت إذا؟؟؟

12. نهار تبغي تاخذ شي بياسة من جيربيست أجي قلب في المجموعة ديالنا واش كاين كوبون باش تنقص الثمن (البحث في المجموعة باسم السلعة تايعطيك جميع المواضيع اللي تدارت عليها) ويلا مالقيتيهش راه ممكن تطبلو ونحاولو إن شاء الله باش نلبيو الطلب ديالك.

13. آخر نصيحة … اضرب وقيس!! راه العام طويييل ويلا شريتي بديك 10000 درهم اللي عاطياك البانكة الحق فيها وساليتيها بكري … تايجيو هميزات من بعد و تاتبقى تاكلك الفقصة عليهم لذلك ما تخسرش فلوسك في الاشهر الاولى من العام و فرق الشرا على العام كامل.

 

اللي بغى يسول على شي حاجة خاصة بالتسوق من المواقع الصينية أو يطلب شي كوبون ما عليه غير يلتحق بنا في مجموعتنا على الفيسبوك:

www.facebook.com/groups/AliExpressPourMarocains

عن Zade

مدون مغربي أعشق كل ما له علاقة بالتكنولوجيا. أقوم بعملية التسوق من العديد من المواقع الصينية منذ ما يفوق السنة. أبحث دائما عن العروض المميزة قصد الاستفادة منها. أحب مساعدة الآخرين بخبرتي المتواضعة في هذا المجال.

شاهد أيضاً

عرض جديد على موقع جيربيست

حصريا: عرض جديد على موقع جيربيست

العرض الجديد على موقع جيربيست كما لا يخفى عليكم فقد ظهر في الآونة الأخيرة، وعلى …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.