الرئيسية / أشهر مواقع التسوق الصينية / GearBest.com / إحذروا النصابين باسم موقع غيربست

إحذروا النصابين باسم موقع غيربست

إحذروا النصابين باسم موقع غيربست…

السلام عليكم ورحمة الله تعالى وبركاته…

ياكما انتي ولا انت من الناس اللي تنصب عليهم مؤخرا من طرف أشخاص منتحلين شخصية موظفين ديال غيربست في دول أخرى؟

🤣🤣🤣🤣🤣

المجموعات بحال ديالنا، بقدر ماهي فضاء زوين ومفيد وممتع واللي كانستافدو منو جميع، بقدر ماهو أيضا مجال خصب لواحد الطبقة من الناس اللي قررات تستثمر الذكاء ديالها في أعمال السرقة والنصب والاحتيال، ولم لا التخريب…

شحال من قليل النية (ولاد ضد الحلال!) كايبان ليهوم فالعضوات والأعضاء ديال المجموعة بحال شي قطيع ديال مسلوبي العقل (عفوا على العبارة) واللي ممكن يگيدوهوم كيف ما بغاو للمسلخة! ومع الأسف، بزاف ديال الناس مازالين كايطيحو في الفخ…

كيف ما كانعرفو كاملين، المثل واضح وضوح الشمس في نهار جميل… الطماع كايغلبو الكذاب!

إيوا آ سيادنا ردو بالكم من واحد النوع ديال الكذابين اللي كايجي عندك ويگول ليك مثلا :
أنا موظف عند GearBest Polonia ههه، ماعرفناها واش كاين ولا لا هاد الفرع ديال هاد الشركة، و حقا أنا مستعد نعاونكم باش تتقداو مزيان وبسرعة وكذلك تتجنبو مشاكل مع الديوانة …

أح ح ح ح… الوتر الحساس ديال الديوانة عند خوتنا المغاربة! كايحارب الديوانة بحال إيلا كايحارب الكوليرا ! غير كا يسمع تسهيلات مع الديوانة صافي كا يتحلو ليه البولونات، وكايطيحو ليه ريوگو، والمودوپاس ديالو كا يتآفيشا…

😂😂😂😂😂

أحبتي في الله، أنا لا أريد أن أطنز عليكم… ولكن بمقدوري أن أنصب على نسبة كبيرة منكم بنفس الطريقة، بل وبأحسن منها كثيرا..! هههه

😂😂😂😂😂

هاد الدخلة السينمائية اللي كايديرو هاد الخوت، هي أولى مراحل ما يسمى بالهندسة الاجتماعية على شبكة الأنترنت، وهي تعتبر الوسيلة المجانية والفعالة لاختراق خصوصيات الضحية من أجل استلاب ممتلكاته الافتراضية منها والحقيقية. (اللي بغا يتعلم هاد الهندسة، زوج تصاور وخمسين درهم ويراسل بريد المجموعة)

ماكاتبانش ليكوم هاد اللعيبة بحال دوك اللقطات الأخرين ديال شي فيلم، فاش كايكون اليأس أخد مأخده من البطلة أو البطل، حتى كايخرج شي واحد خارق من حيث لا يحتسب، وكايجيب معاه الحل لكل مشاكل العالم والكون في ديك اللحظة؟!!!

… يا سلاااااام… آفيق غسل وجهك!

داكشي كيف ما گالو فرانسيس :
C’est trop beau pour être vrai…

التسجيل في موقع Gearbest 01

غيربست ولا أي شركة كاتحترم راسها، إذا بغات تدخل معاك في اتصال، غادية تستعمل قنوات رسمية، بطريقة مهنية پروفيسيونال! عناوين بريد رسمية، پروفيلات تواصل اجتماعي رسمية… إلخ.

حتى الناس اللي خدامين معاهم فوسط شبكات التواصل الاجتماعي، ما يمكنش يخدمو كيف ما بغاو، عندهوم ظوابط اللي كاتحطها الشركة الأم. بل و يمكن ليك في أي لحظة تراسل ديك الشركة وتسول على هاد الشخص واش خدام معاهم… ولكن بزاف ديال الناس مع الأسف كايجهلو هادشي… وكايكونو لقمة سائغة لدوك الناس لاخرين، اللي كايبدعو دائما، مع الأسف، فالتاحراميات!!!

لذلك، الله يرحم ليكوم الوالدين، اللي دق عليه شي واحد فالپريڤي وگال ليه بحال هاد الكلام المعسول… ولا اللي شاف شي پوسط ديال شي واحد من هاد الناس فشي بلاصة… يتوخى الحذر و يرد بالو ويحضي جنابو!
واللي فايت ليه تزرف…بلا مايدير ديك اللعبة ديال دير راسك وسط الريوس و عيط… ضروري ما نبلغو على بحال هاد الحالات المتفرقة باش الناس تعتبر.

الحاصيل، ها وذني منكم…

😋😋😋😋😋

ملحوظة : اللي باغي يدوز شي تيلفون ساوي فوق ألفين درهم من الديوانة بلا خلاص، ويوصلو في ثلاث أيام حتى لباب الدار، ويجيب ليه الفاكتور معاه پيتزا كاطسيزون هدية… يدخل عندي پغيڤي!!!

ملحوظة زوج : أصلا ماتانآكسيپطي حتى واحد فالپغيڤي! غادي نحط معلومات ديالي في آخر الموضوع، سيفط ليا فيهوم تسبيق ديال 660 درهم فويسطيرن يونيون. وماتنساش تكتب اسم المنتوج المطلوب.

ملحوظة زوج مكرر : و الله يعطيكم وجهي هههه

ودمتم سالمين.

 

الرابط الدائم لهذا الموضوع على مجموعتنا بالفايسبوك :

https://www.facebook.com/groups/AliExpressPourMarocains/permalink/1974860039445018/

 

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست خواتاتي ، خوتي… ها واحد السلام عليكم. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *