الرئيسية / أشهر مواقع التسوق الصينية / GearBest.com / الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست

الشرح الشامل لكيفية الاستفادة من نقط موقع جيربست

خواتاتي ، خوتي… ها واحد السلام عليكم. اليوم جايبين ليكم واحد الموضوع مهم وكايسولو عليه الناس اللي مهتمين…

اللي بغا يشاركو مع ناس أخرين في مجموعات أخرى من باب الاستفادة، يحترم على الأقل المجهود و يكتب “منقول” وايلا استطع يحط رابط للمجموعة ديالنا، علاش لا؟!! حنا بعدا هنا، كا نعجنو خبزنا بيدنا وما كانسرقوش المجهودات ديال ناس أخرين!!! راني نشوف فيكوم ههه
😂😂😂😂😂

موضوع اليوم :

كيفية الاستفادة من نظام النقط في موقع جيربست GearBest Points

موقع جيربست، بحال عدد من المواقع الشبيهة، داير واحد القضية زوينة اللي كاتخليك تستفد من التعامل ديالك معاه كمشتري. بطبيعة الحال، هادشي داخل في إطار استراتيجيات التسويق اللي الهدف الرئيسي منها هو زيادة مبيعات الموقع، ولكن المشتري حتى هو كايستفد وما يمكنش ننكرو هاد الواقع. الصراحة، من خلال التجربة الشخصية، برنامج الوفاء المبني على النقط ديال موقع جيربست خدام بصح وفيه الاستفادة ديال بصح.

أنت شاري شاري، إيلا لقيتي موقع كايتعامل مزيان وفيه ديما الجديد وكايدير تخفيضات هامة و و و… حتى حاجة ماكاتمنعك ترجع تشري من عندو!

المهم، برنامج الوفاء المبني على النقط المبدأ ديالو بسيط : جيربست كايطلب منك تقوم ببعض العمليات، وهو كايعطيك عدد من النقط بالمقابل. هادوك النقط، كايتحولو لدولارات اللي كاتتزاد في الرصيد ديالك على الموقع. ولكن، مايمكنش ليكش تاخد ديك الفليسات ههه… كايمكن ليك تستعملها كتخفيضات على أثمنة ديال منتوجات اللي كاتشريها من عندهم. دابا نشرحو هادشي بمثال حي من بعد…

شرح برنامج الوفاء المبني على النقط على موقع جيربست

😋😋😋😋😋

كم عدد النقط اللي يمكن تحصل عليها؟

دابا، نشرحو اشنا هوما العمليات اللي كايطلب منك الموقع، وشحال كايعطيك من نقطة على كل عملية منهوم :

  • ⁩ملي يالاه كاتتسجل في الموقع، كايعطيوك 50 ديال النقط، كترحيب ؛
  • ⁦⁩ملي كاتزيد تصويرة ديال پروفيل عندهم، كايعطيوك 20 نقطة أخرى. ملحوظة : ماشي ضروري تكون صورتك الحقيقية إيلا مابغيتيش تحطها ؛
  • ⁦⁩ملي كاتنخرط في النشرة البريدية Newsletter ديال الموقع، كايعطيوك 10 نقط أخرى ؛

هاحنا مازال ماشرينا والو و وصلنا ل 80 نقطة. خاصك تعرف بلي كل خمسين نقطة كاتعطيك دولار واحد… متبعين معايا؟ تقدر في هاد اللحظة بالذات تستفد من تخفيض بهاد النقيطات ولكن في حدود 30 في المية من ثمن المنتوج. مازال مافهمتي؟ ساهلة..

إيلا اختاريتي مثلا دابا منتوج ساوي 3 دولار، ملي كاتجي تخلصو في الصفحة الأخيرة من عملية الدفع، كاتبان ليك التحت إمكانية استعمال النقط في التخفيض. الموقع، الله يخلف عليه، كايحسب ليك أوطوماتيكيا شحال ديال النقط اللي مسموح بيها… بلا ماتجبد الكاليكاتريس وتبدأ تحسب هههه… ثلاثة دولار، كاينقص ليك الموقع داك الدولار اللي مجموع عندك، وكايتقام عليك المنتوج غير بزوج دولار… إيوا تخيل أنك شاري منتوج ب 100 دولار، وانت جامع اكثر من 30 دولار ديال النقيطات…

المهم هو نعقلو على نسبة 30 في المية من ثمن المنتوج! نرجعو نكملو العمليات الأخرى اللي كاتاخد عليها نقيطات آخرين… هي اللي فيها المرقة ههه!!!

  • ⁦بمجرد ماكاتشري شي منتوج، كايعطيك جيربست نقطة على كل دولار من ثمن داك المنتوج. مثلا شريتي منتوج ساوي 37 دولار، كايزيدك 37 نقطة… شريتي بمبلغ 1000 دولار، يعطيك 1000 نقطة… وهكذا… يعني “حج و حاجة”، أنت شاري شاري، ونقيطات كايتزادو… هادي مربوحة!
  • ⁦ملي كاتوصلك السلعة، وكاتتأكد باللي راها مزيانة (إيلا كان فيها شي مشكل، راه كاين موضوع آخر كانشرحو فيه شنو المعمول في ديك الحالة)، كايطلب منك الموقع تدير ليه مايسمى ب Review، يعني كانعطي رأيك في المنتوج كيف داير، رأيك في عملية الشراء، رأيك في المدة ديال التوصيل… إلخ… المهم أنه كايعطيك نقيطات على هاد التعليقات. ملحوظة : ماشي ضروري تگول العام زين ههه… كاتعطي رأيك بصراحة ، عجبك ما عجبك… هوما كايشكروك بصفة عامة على التفاعل ديالك، وكايستفدوا بطريقة غير مباشرة من انتقادات المشترين باش يطوروا العروض ديالهوم… الناس خدامين ههه
  • ⁦كاتاخد 5 نقط على تعليق عادي على عملية الشراء. يعني كاتهدر غير على عملية الشراء كيف دازت، بلا مانهدر على المنتوج ؛
  • ⁦كاتاخد ابتداء من 50 نقطة على تعليق مفصل شوية على المنتوج : كاتگول ليهوم الايجابيات Pros اللي بانوا ليك، السلبيات Cons، و كاتحط صور حقيقية ديال المنتوج (تقدر تحط خمسة صور على الأكثر)، ويلا بغيتي تضمن أكبر عدد من النقيطات، كاتحط فيديو ديال المنتوج. (إيلا بغيتي تعرف علاش وكيفاش خاصك تصور فيديو لمنتجات جيربست، راه نشرنا موضوع مفصل هنا).
  • ⁦⁩الثمن ديال المنتوج كايلعب دور كبير في تحديد عدد النقط اللي تقدر تحصل عليها. بصفة عامة، مايفوتوش ليك 10 نقط إيلا كان ثمن المنتوج أقل من 1 دولار، مايفوتوش ليك 50 نقطة إيلا كان ثمن المنتوج أقل من 5 دولارات، و مايفوتوش ليك 100 نقطة إيلا كان ثمن المنتوج أقل من 10 دولارات ؛
  • ⁦⁩التعليقات الخمسة الاولين ديالك على المنتوجات الخمسة الأولين اللي شريتي كاتاخد عليهم داكشي مضوبل ؛
  • ⁦إيلا الفيديو ديالك عجب فريق العمل ديال جيربست، كايتصلوا بيك وكايگولوليك بلي راهوم بغاو يحطوه مع الفيديوات الرسمية ديالهوم في الموقع والتطبيق، و باللي غاديين يعطيوك 250 نقطة. أنت بطبيعة الحال، كاترفض وكاتدفع شبابك غالي… وكاتطلع للجبل هههه… (راه غير ضاحكين، عنداك تديرها !)

مزيانة هادي، أنت شاري شاري، كاتكونفيرمي السلعة فاش كاتوصل، كاتكتب تعليقات مختصرة، كاتسيفط تصيورات و فيديوات… كلشي مستفد من هادشي…

هاد الفيديو مثال من القناة ديالنا على فيديو اللي سيفطناه لموقع جيربست وخدينا عليه نقيطات :

ودابا أنا أشنو غادي نستافد من هادشي كامل؟؟؟

  1. ⁦أنت مستفد من نقيطات كايوليو فليسات ؛
  2. ⁦⁩موقع جيربست مستفد من آراء و Feedback على المنتوجات والخدمات ديالو وهادي معلومات قيمة باش يطور نفسو ؛
  3. ⁦⁩بقية المشترين ديال جيربست كايستافدو من تجربتك في الشراء و الأهم من ذلك كايشوفو صور و فيديوات حقيقية ديال منتوجات …

بصح كلشي مستفد !

طريقة أخرى للاستفادة من النقط دارها جيربست على التطبيق ديالها : بمجرد انك تدخل يوميا للتطبيق كاتاخد نقيطات!!! سميتها Daily Sign-in… جربوها … (انظر الصورة)

⁦⁩واحد القضية مهمة بزاف :
مايمكنش ليك تستخدم في نفس الوقت تخفيض بالنقط مع طريقة أخرى في التخفيض بحال الكوبون أو العروض التخفيضية المحددة. هادي واضحة… إيلا كان صاحبك عسل، ماتلعقوش كامل ههه…

للإشارة، هاد النقط عندهم مدة صلاحية : فاش كايقرب يسالي العام، الموقع ديال جيربست كايسيفط ليك رسالة كايفكرك بالعدد ديال النقط اللي عندك و بالكمية اللي غادية تسالي المدة ديالها في واحد التاريخ محدد. يعني رد بالك…

مثال عملي :

النقط اللي عندك دابا، وربحتيهم قبل من أكتوبر 2018، غادي تسالي مدة الصلاحية ديالهم في مارس 2019.

 

جديد : ابتداء من فبراير 2018، موقع جيربست دار شي تعديلات على نظام النقط في علاقته مع GB Wallet. مازال ماعندناش معلومات مفصلة على هادشي، من بعد ونكتبو شي مقالة خاصة بهاد الموضوع.

بقات دابا واحد الطريقة أخرى اللي كاتخليك تستفد من عدد أكبر ديال النقط… فيها المرقة ديال الغنمي ههه…ولكن هاديك غادي نگولوها ليكم في مقالة أخرى إن شاء الله! هي طريقة معروفة و ما معروفاش… ولكن احنا كانعرفو ليها مزيان! 😉😋😘

 

إيلا وصلتي لهنا بالقراية، فهذا يعني أنك دابا صافي فاهم مزياااااان كيفاش تربح نقيطات مع موقع جيربست… إيلا طرحتي شي سؤال عبيط، موحال واش يجاوبك شي واحد ههه…

 

ملحوظة : المعلومات اللي في الموضوع تم تجميعها اعتمادا على المعطيات الحالية، في حالة تبدلات شي حاجة، ضروري نديرو الميزاجوغ ههه

 

يالاه… دمتم سالمين.

 

رابط شرح النقط على موقع جيربست الرسمي :

https://www.gearbest.com/about/about-points.html

 

رابط الموضوع على مجموعتنا بالفايسبوك :

https://www.facebook.com/groups/AliExpressPourMarocains/permalink/2006680209596334/

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

عرض جديد على موقع جيربيست

حصريا: عرض جديد على موقع جيربيست

العرض الجديد على موقع جيربيست كما لا يخفى عليكم فقد ظهر في الآونة الأخيرة، وعلى …

2 تعليقان

  1. شكرا بزاف على الشرخ ديالك وتحية كبيرة على طريقة الشرح لي مكتجيبش الملل للقارئ وكتخليه يكمل الموضوع حتى النهاية

    • مرحبا بك السي كريم.
      شكرا على التفاعل وعلى الملاحظات الجميلة اللي، أكيد، غادية تخلينا نزيدو ننتجو إن شاء المزيد من المقالات. ماتنساش المجموعة ديالتنا على الفايسبوك.
      دمت سالما.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.