الرئيسية / Uncategorized / الموضوع الشامل حول الأكشن كاميرا Action Cameras

الموضوع الشامل حول الأكشن كاميرا Action Cameras

الموضوع الشامل حول الأكشن كاميرا Action Cameras

ها واحد السلاااااااام عليكم!

موضوع اليوم حول هادوك الكاميرات الصغيورات العفيريتات اللي كايصوروا تحت الما و فالثلج و فالسما… ما خلاو فين ما صوروش!

كايعيطوا ليهوم الأكشن كاميرا، Action Cameras، وأكيد راكوم عارفين علاش سماوهوم هاكداك… لا؟!! ساهلة…

ماهي الأكشن كاميرا و لاش كاتصلاح؟

كاين بعض الرياضات وبعض الهوايات اللي كاتتميز بالحركة، وملي كان بنادم كايبغي يصور راسو كايدير ديك الرياضات، ما كانش كا يقدر نظرا للحجم ديال آلات التصوير اللي ما كايسمحش ليه باش يهزها معاه فوق شي موطور ولا پيكالة، ولا شي خشبة ديال الركمجة (أو السورف بلغة الدبلجة عند MBC2 ههه)، ولا يلصقها فشي طوموبيل ولا فالكاسك ديالو فاش يبغي ينقز من شي طيارة بالپاراشيت… تخيلو معايا بنادم مليوح بكاميرا كانون و لا نيكون من السما …

هنا فين فكروا بعض الشركات في صنع كاميرات خاصة، صغيورة، صحيحة، كاتصبر للماء، و بالأخص …تكون كا تصور بدقة مزيانة! وهنا فين بانت أشهر أكشن كاميرا … Go Pro

ال GoPro كاميرا احترافية، و ساوية الثمن و في الحقيقة تستاهل ثمنها بالمقارنة مع المواصفات اللي فيها. إلا أن القدرة الشرائية كاتختلف من واحد لواحد، لذلك ظهرت في السوق كاميرات أقل ثمنا و (يحكى أنها) كاتصور ڤيديوات لا تقل قيمة عن ما تصوره ملكة الكاميرات الگوپرو…

وهنا بيت القصيد…

===========================

في القناة ديالنا على اليوتيوب، غاديين تلقاو هاد فيديو فتح العلبة ديال كاميرا EKEN H9R اللي معظم الناس في الأنترنت كايشكروها :

واش الأكشن كاميرا اللي كاتتباع فالمواقع الصينية مزيانة؟

هاد الكاميرات اللي كايتباعو فمواقع التسوق من الصين، كيفاش القضية ديالهوم؟ علاش موجودين؟ وعلاش رخاص؟ واش مربوحين؟… أسئلة بزاف غادي نحاولو نعطيو بعض عناصر الإجابة عليها في هاد الموضوع المتواضع!

تنبيه :

قبل ما نمشيو بعيد و نتودرو فالحصيدة… خوكم ماشي خبير فالكاميرات ديال الأكشن وماشي معلم ديال الإليكطرونيك. و في حياتي كاملة، شاري كاميرا وحدة (دابا ندير الليان ديالها في آخر الموضوع) ومصور بيها مع العائلة كانغوصو في أعماق واحد لاپيسين غارق بشي ميترو و ستين سنتيمتر… باينة ما غاديش نپارطاجي معاكم الصور والڤيديوات!!!😉

المصنعين ديال الأكشن كاميرا كثروا بزاف في الصين نظرا لما تعرفونه جميعا عن الاقتصاد الصيني والطفرة اللي كاينة تماك… كلشي كايتصنع، كلشي كايتقلد، اليد العاملة رخيصة، مواد التصنيع رخيصة… كملو من راسكم! لذلك الأثمنة ديال هاد الكاميرات عرفات واحد التخفيضات مهمة، زادت من الحدة ديالها التنافسية الشرسة مابين المصنعين والبائعين!

ماهي الأشياء اللي خاصني ناخد بعين الاعتبار قبل ما نشري شي أكشن كاميرا من غيربست ولا علي إكسپريس ولا شي موقع آخر من الشينوا؟

دقة التصوير Résolution

عدسات التصوير اللي كاتكون فديك الكاميرات تقريبا كلها جاية من عند مصنع واحد ولا زوج مصنعين، غالبا كاتلقى Sony ولا Omnivision… وكل عدسة عندها ثمن خاص بيها على حسب مواصفاتها : المجسات sensors اللي فيها، فتحة العدسة aperture اللي فيها…إلخ.

بطبيعة الحال، زيد فالما زيد فالدقيق… وضروري باش ينقصو الثمن غاديين يحطوا أرخص حاجة…. لا؟!!!

مثلا، كاتلقى مكتوبة عبارة Résolution 4K، و كاملين تقريبا ولينا نعرفو أن هاد الكاليتي ديال 4K هي “راس السوق” حاليا. ولكن اللي ما كانعرفوش هي أن هاديك الكاميرات الرخاص ما يمكنش يكون فيهوم هاد الكاليتي، لسبب بسيط أن الماتريال ما كايسمحش ليها تصور بديك الدقة!

كاين واحد النوع من التحايل على المعلومة، كايستغلو فيه المصنعون قدرة العدسة مع اللوجيسيال أنها تقدر تقلد أو تحاكي دقة 4K ولكن عمرها توصل ليها!

عدد الصور في الثانية Frame Rate

المعروف أن أقل عدد ديال الصور فالثانية باش تبان فيديو عادية، هو 24 صورة في الثانية (بالنسبة الرسوم المتحركة) وابتداء من 25 بالنسبة للفيديو اللي فيه أشياء حقيقية، بنادم طبيعة، إلخ…

نرجعو لنفس المثل ديال الما و الدقيق… أرخص ماتريال هو اللي فيه أقل عدد ديال الفرايم رايت! و لكم أن تتخيلوا الفرق بالمقارنة مع كاميرات اللي ساوية 3000 و 4000 درهم!

⁩حجم البيانات في الصورة Bitrate

ببساطة، صورة بكاليتي مزيانة كاتاخد بلاصة أكبر فالكارط ميموار… (مالگري مشيتي، گعدتي في لا مييييموار وياااه…ههه).

الكاميرات الرخاص كاتكون ناقصة فيهوم البيترايت، لأن الهدف ديالها هي تصور ليك فيديو مابيهش، وندير ليك خاطرك…

⁩الكاليتي ديال الويفي والبلوتوث…

كاميرا رخيصة ماتلقاش فيها بلوتوث بعدا…. ولا غير يلا شي شركة زعمات و صافي!

ولكن كلهم فيهم الويفي (ماشي الصولد ديال كونيكسيون هههه)، باش كايمكن ليهوم يتكونيكطاو مع الهاتف و تشوف الفيديوات و تدوزهوم لا ميموار ديال السمارتفون….

حتى الويفي ديال الأكشن كاميرا فيه وفيه…

⁩الباتري

كايكون قليل غالبا، كاين 800mAh، 900mAh،… قليل فين لقيت شخصيا فوق 1000mAh…

هاد القضية كاتأثر على مدة التصوير ديال الڤيديو والجودة والتخزين فالذاكرة… كلما زادت الجودة وبالتالي الحجم ديال الفيديو، كلما نقص الطول ديال الفيديو من حيث الباتري كاتخوى دغيا!

إيوا، شنو خاصني ندير دابا؟

الحاصيل، هناك المزيد من المعطيات اللي خاص ننتابهو ليها…

المطلوب :

🔴قراءة جيدة لمواصفات المنتوج قبل الشراء، باش تعرف راسك علاش داخل… البائع غادي يكون حاط كلشي تماك.

🔴مشاهدة العديد من فيديوات reviews على الانترنت وقراءة البلوگات المتخصصة… (أنا شخصيا هاد المعلومات جمعتها من بزاف ديال مقالات باللغة الإنجليزية!)

😉😉😉😉😉

هذا فيديو فتح علبة الكاميرا اللي شريت :

رابط الشراء : https://goo.gl/6kMQxn

 

خلاصة شخصية حول الأكشن كاميرا Action Cameras

بالنسبة لي، هناك ثلاثة أنواع ديال فئات الكاميرات حسب الثمن :

  1. أقل من 30$، هادي غير باش تقضي…ماتنتاظرش منهم المعجزات!
  2. من 40$ حتى لديك 65$، في المتوسط… كاميرات يحمرو ليك الوجه ومايحشموكش مع الخوت!
  3. انطلاقا من 80$ وانت طالع، آراك للخناشي ديال الدقيق!!!

و مع ذلك، اقراو مزياااان قبل ماتشريو…

والله أعلم! ( وشي دعيوات للوالدين!😉)

ودمتم سالمين.

 

هذا الرابط الدائم للموضوع الأصلي على مجموعتنا الخاصة على الفايسبوك :

https://www.facebook.com/groups/AliExpressPourMarocains/permalink/1969113480019674/

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

Lenovo ZUK Z2 Pro هاتف مميز بثمن مناسب

Lenovo ZUK Z2 Pro هاتف ذكي من الشركة الصينية ZUK التابعة للشركة LENOVO بسعة 6 …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *