الرئيسية / المدونة / كيفاش تشري هاتف من الشينوا بلا ماتكون عندك مشاكل مع الديوانة؟

كيفاش تشري هاتف من الشينوا بلا ماتكون عندك مشاكل مع الديوانة؟

كيفاش تشري هاتف من الشينوا بلا ماتكون عندك مشاكل مع الديوانة؟

السلام عليكم ورحمة الله تعالى وبركاته…

أكيد العنوان ديال الموضوع دار خدمتو مزيان…داكشي لاش راك كاتقراي/كاتقرا فهاد السطور اللي مكتوبة هنا !

اختاريت هاد العنوان باش نحاول نلفت الانتباه لشي حوايج ما كاننتابهوش ليها، وحتى كاتطيح الفاس (ولا المكناس؟!!) فالراس عاد كايبقا بنادم يتشكا ويقول : قولبوني! زرفوني! داو ليا رزقي!…

أحبتي في الله، لا أريد أن أطنز عليكم، لكنكم تعلمون جيدا أن لا أحد يعذر بجهله القانون. خاصنا نقراو مزياااااااان عاد نكليكيو!

واخا… دابا إيلا قريتو حتى لهنا، يعني راكم متبعين! نديرو شي امتحان صغير…

حتى واحد فيكم ما انتبه لواحد الخطأ صغير كاين فالسطر الخامس… ما متبعين والو هههه. غير آجي وگول راني كانقرا.

المهم دابا ملي رجعتي لهنا واكتشفتي باللي ماكاين حتى خطأ و أنني غير كانقشب معاك، آجي نكملو هههه…

😂😂😂😂

ماهي الطريقة الصحيحة أو السليمة لشراء هاتف من الشينوا بلا ماتكون عندك مشاكل مع الديوانة؟

راه گلنا : بلا ماتكون مشاكل…ماشي بلا ما تخلص الديوانة هههه. هاد القضية ديال الديوانة زيرو ولا لا مابقيناش نناقشوها : السلعة ديالك تقدر تدوز، تقدر تتشد!!!

آجي نعرفو كيفاش تشري وانت مرتاح!

بزاف ديال الناس كايختارو شركات الشحن السريع لأسباب متعددة :

  • يالله بداو يشريو من الانترنت وما عارفينش القصة ههه ؛
  • مزروبين وما فيهم اللي يتساينو ؛
  • ماعندهومش مشكل مع المصاريف، المهم توصل السلعة ؛
  • عياقة (ههه، غير ضاحكين بلا ماتتقلق!) ؛
  • أسباب أخرى هوما اللي عارفينها…

المشكل أنه فاش كاتوصل السلعة وكاتتشد ف كازا، عااااااااد كايجي بنادم لهنا و يبدا يتشكى و يسب فالشركات والديوانة والشينوا والحاج علي…

مالنا؟ القضية ساهلة ماهلة… Facile macile… كيف ما كايگولو الگوار!

ضروري غادي تخلص الخدمة دبال شركة الشحن السريع

للمعلومة، مبلغ 600 درهم الخاص بشركة أرامكس (اللي الناس كايزعمو يسيفطو معاها بزاف)، هو مبلغ ثابت كاتاخدو الشركة على خدمة الطرانزيت ديال السلعة في حالة شداتها الديوانة.

جميع السلع القادمة من الخارج كاتدوز من الديوانة، كاين اللي كايطلقوها كاين اللي كاتدوز.

ماعندك ما تطلب من أرامكس ينقصو ليك. الناس اللي كايگوليك نتشطرو معاهوم…. ههه… نسا!

ويلا تشد ليا التيلفون في كازا ؟؟؟

ها هوما السيناريوهات المحتملة اللي تقدر تدير إذا وقع الفاس فالراس:

  1. إيلا محتاج تاخد الهاتف بأي ثمن، حسب بشحال غادي يتقام عليك السفر إلى الدار البيضاء+التعب ديال طلع وهبط ودوز من مكتب لمكتب… وشوف ديك الساع : إيلا جات بحال ولا أكثر من ستمية درهم، خلي أرامكس هوما اللي يخرجو السلعة، ويكملو بيها الطريق حتى لعندك. في ديك الحالة، غاديين يطلبو ليك تليگاليزي ليهوم واحد التصريح عاد يبداو فالإجراءات ديالهوم.
  2. إيلا جات المصاريف أقل من ستمية درهم، وتقدر تمشي، ضروري أرامكس خاصها تعطيك واحد الورقة سميتها bulletin de livraison هو اللي كاتخلص عليه 150 درهم، وكاتمشي تتطلع وتهبط بوحدك.
  3. في حالة درتي بناقص وما بقيتيش باغي الهاتف، شوف مع البائع واش تقدر ترجع فلوسك، انت وزهرك و داكشي اللي فاتفاقية البيع، يقدرو يردوها ليك كاملة ولا شي نسبة، يقدرو مايردو ليك والو…هاد القضية عند غيربست مزيانة بعدا.

ملحوظة : كل ما تعطلت السلعة عند الديوانة كاتخلص عليها المباتة ديالها على كل نهار.

 

خلاصة عامة :

ما تختارو الشحن السريع إلا إذا كنتو عارفين هادشي كلشي. أرامكس أو DHL أو شركات الشحن السريع بصفة عامة، الأثمنة ديالها غالية الصراحة، ولكن الكليان خاصو يكون عارف من قبل باش ما يقولش راهم قولبوني و بغاو يشفروني.

اللي بغا شي هاتف أو شي حاجة غالية تقدر تتشد فالديوانة، يسيفطها مع البريد العادي المسجل، ويزيد يخلص ليها لاسورانس عند البائع (ايلا بغا يزيد يرتاح من المشاكل المحتملة) و يتساينو يجيه حتى للدار. إيلا داز بلا ديوانة مزيان، ما دازش كاتجيك معاه ورقة ديال الخلاص مع خدمة أمانة.

ماتنساوش : دعيوات للوالدين. واللي بغا ينقل الموضوع يفيد بيه ناس أخرين مرحبا…غير ماينساش يكتب منقول ويدير سمية الگروپ. ولا يتصل بيا ولا بشي واحد من المجموعة يوريه فين ناوي ينشرو. شكرا.

و دمتم سالمين.

 

الرابط الدائم للموضوع على مجموعتنا بالفايسبوك، انضموا إلينا اليوم…

https://www.facebook.com/groups/AliExpressPourMarocains/permalink/1971347393129616/

 

عن Soufyane

سفيان يهتم كثيرا بمستجدات عالم التكنولوجيا ويعشق التسوق عبر شبكة الانترنت، عندما يسمح رصيده في بايبال بذلك. خلال أوقات فراغه، يزاول هواية رسم الكارتون.

شاهد أيضاً

Xiaomi-Mi-Band-3-vs-Xiaomi-Mi-band-2

ها علاش خاصك تفكر تشري Xiaomi Mi Band 3…

  السوار الذكي تشياومي مي باند الإصدار الثالث خرج وبدا كايتباع مؤخرا… إيلا كنتي أصلا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.